O‘zbekiston muftiysi “Fatvo sohasidagi ulkan yutuqlari uchun” xalqaro mukofoti bilan taqdirlandi

 

O‘zbekiston musulmonlari idorasi raisi, muftiy Shayx Nuriddin Xoliqnazarovga “Fatvo sohasidagi ulkan yutuqlari uchun” Imom Qarafiy xalqaro mukofoti topshirildi. Bu haqda O'zbekiston musulmonlari idorasi xabar berdi.

 

Taqdirlash marosimi Misr poytaxti Qohirada bo‘lib o‘tgan “Global o‘zgarishlar sharoitida oila va fatvo institutlari” xalqaro konferensiyasining ochilishida o‘tkazilgan. Mazkur konferensiya Butun dunyo bo‘ylab Fatvo boshqarmalari va tashkilotlari Bosh kotibiyati tomonidan Misr prezidenti Abdulfattoh as-Sisi homiyligida tashkil etilgan.

 

Mukofotni Misr bosh muftiysi, professor Nazir Muhammad Ayyod, Misr Vaqf ishlari vaziri doktor Usama Al-Azhariy hamda Xalqaro Islom fiqhi akademiyasi bosh kotibi doktor Qutb Mustafo Sano topshirgan.

 

Tadbirda dunyoning turli mamlakatlaridan 500 dan ortiq ishtirokchi qatnashgan. Konferensiya ishtirokchilariga O‘zbekistonda diniy ta’lim sohasida amalga oshirilayotgan islohotlar, shuningdek, muftiy Shayx Nuriddin Xoliqnazarovning faoliyatiga bag‘ishlangan maxsus videofilm namoyish etilgan.

 

Mukofot buyuk olim va faqih Imom Shihobuddin al-Qarafiy (1228–1285) nomi bilan atalgan. U fatvo berish amaliyotini takomillashtirish, islomda mo‘tadillik tamoyillarini targ‘ib qilish, jamoaviy ijtihodni rivojlantirish hamda zamonaviy masalalarga shariat asosida yechimlar ishlab chiqishga hissa qo‘shgan ulamolarga beriladi.

 

Taqdirlash marosimida O‘zbekistonda diniy ta’lim va fatvo faoliyati yo‘nalishida amalga oshirilayotgan ishlar, jumladan, Fatvo markazining faoliyati va mo‘tadillikni targ‘ib qilishga qaratilgan tashabbuslar haqida ham ma’lumot berilgan.