Toshkentda avtomobillar oqimi 30 foizga oshdi, tirbandlik esa 6 ball darajasida saqlandi
Yangi o‘quv yilining ilk kunida transport oqimi oshdi, biroq tirbandlikning keskin kuchayishiga yo‘l qo‘yilmadi.
2026 yil 2 sentyabr kuni, yangi o‘quv yilining ilk kunida Toshkent shahridagi transport oqimi 24 avgustdagi odatiy ish kuniga nisbatan 30 foizga oshdi. Shunga qaramay, poytaxt bo‘yicha umumiy tirbandlik darajasi 6 ball atrofida saqlab qolindi. Bu haqda Yo‘l harakatini tashkil etish markazi xabar berdi.
Yuklama oshgan ayrim yo‘l uchastkalarida harakat tezligi pasaygan bo‘lsa-da, tirbandliklarning keskin kuchayishiga yo‘l qo‘yilmadi.
Bunga transport oqimini real vaqt rejimida monitoring qilish, svetoforlarni tezkor muvofiqlashtirish va yuzaga kelayotgan tirbandliklarga o‘z vaqtida choralar ko‘rish orqali erishilgan.
Shahar transport oqimlarini markazlashgan tarzda kuzatish va boshqarish maqsadida YHTEM Vaziyatlar markazi faoliyati yo‘lga qo‘yilgan. Markaz orqali poytaxtdagi muhim tartibga solinadigan chorrahalardagi yo‘l holati, svetoforlarning ishlashi, avtomobillar navbati hamda jamoat transporti harakati real vaqt rejimida kuzatib boriladi.
Tirbandlik yuzaga kelgan holatlarda transport oqimi tahlil qilinib, zaruratga qarab svetoforlarning yashil chiroq davomiyligi uzaytiriladi, svetofor fazalari qayta sozlanadi va qo‘shni chorrahalar o‘zaro muvofiqlashtiriladi.
Agar tirbandlikka yo‘l-transport hodisasi, nosoz avtomobil, yo‘l tasmasining yopilishi, taʼmirlash ishlari yoki boshqa omillar sabab bo‘lsa, tegishli xizmatlar jalb etilib, yo‘l harakatini tiklash choralari ko‘riladi.
Vaziyatlar markazida transport holatini doimiy nazorat qiluvchi ishchi guruh faoliyat yuritadi. Unda YHTEM, Toshkent shahar Transport va yo‘l-transport infratuzilmasini rivojlantirish bosh boshqarmasi, Toshkent shahar IIBB Jamoat xavfsizligi xizmati YHXB, jamoat transporti dispetcherlik xizmatlari hamda tegishli mutaxassislar ishtirok etadi.
Yangi o‘quv yilining birinchi kunida avtomobillar oqimi 30 foizga oshgan bo‘lsa-da, tirbandlik darajasining 6 ballda saqlangani transport oqimini real vaqt rejimida boshqarish va muvofiqlashtirish choralari samaradorligini ko‘rsatdi.
