Xorazmda 81 ming nafar kambag‘al aholining holati o‘rganildi
Xorazmdagi kambag‘al oilalarda 48 ming nafar bola borligi aniqlanib, ular uchun qo‘shimcha to‘garaklar tashkil etish vazifasi belgilandi.
Prezident topshirig‘iga ko‘ra, iqtisodiy kompleksning barcha rahbarlari Xorazmda qolib, kambag‘allik bilan ishlash tizimini o‘zgartirish bo‘yicha tahlil o‘tkazdi.
Ikki hafta davomida viloyatdagi 81 ming nafar kambag‘al aholi, ya’ni 19 ming oilaning holati o‘rganildi. Ushbu oilalarda 12 ming nafar ishsiz va 10 ming nafar daromadi past fuqaro borligi aniqlandi.
Ayni paytda Xorazmdagi tadbirkorlar qurilish sohasiga 4 ming, xizmatlar sohasiga 3 ming va sanoatga 2,5 ming ishchi izlayotgani qayd etildi.
Mas’ullarga ishsiz va kam daromadli aholini korxonalar ehtiyojidan kelib chiqib kasbga o‘qitish hamda ish bilan ta’minlash imkoniyatlarini to‘liq ishga solish vazifasi qo‘yildi. Mavjud bo‘sh ish o‘rinlari va kasbga tayyorlash imkoniyatlaridan foydalanish orqali kambag‘al oilalardagi 10–15 ming nafar fuqaroning daromadini oshirish mumkinligi ta’kidlandi.
O‘rganishlar davomida kambag‘al oilalarda 48 ming nafar bola borligi aniqlangan. Biroq ularning kelajakdagi bandligini ta’minlash, alohida shug‘ullanish va hozirdanoq kasb-hunarga jalb etish bo‘yicha maxsus dastur mavjud emasligi qayd etildi.
Viloyatning har bir tumanida kamida 1–2 tadan texnikum va 4–5 tadan o‘quv markazi faoliyat yuritayotgani ko‘rsatib o‘tildi. Yoshlar yetakchilari, hokim yordamchilari va xotin-qizlar faollariga maktab, texnikum va o‘quv markazlarida kambag‘al oilalar farzandlari uchun qo‘shimcha to‘garaklar tashkil etish vazifasi belgilandi.
Shuningdek, Xorazmda kambag‘al oilalardagi 10 mingdan ziyod ayol bola parvarishi bilan band ekani qayd etildi. Bunday oilalar farzandlarining bog‘cha qamrovi 75 foizga ham yetmasligi ko‘rsatib o‘tildi.
Hududdagi yangi loyihalardan kelib chiqib, 646 nafar kollej o‘quvchisi va oliygoh talabasining dual ta’lim asosida kasbiy ko‘nikmalarini oshirish imkoniyati borligi ta’kidlandi.
Bundan tashqari, kambag‘al oilalardagi pensiya yoshidagi va nogironligi bo‘lgan 526 nafar insonga ijtimoiy yordamni kuchaytirish orqali ularni parvarish qilayotgan oila a’zolariga daromadli mehnat bilan shug‘ullanish imkoniyatini yaratish mumkinligi qayd etildi.
