Tibbiyot va farmatsevtika xodimlarini davlat ro‘yxatidan o‘tkazish tizimi joriy etiladi

O‘zbekistonda 2027-yil 1-iyuldan tibbiyot va farmatsevtika xodimlarini xalqaro standartlarga muvofiq davlat ro‘yxatidan o‘tkazish tizimi joriy etiladi. Mutaxassislarning kasbiy malakasi Tibbiyot va farmatsevtika xodimlarining malakasini baholash markazi tomonidan mustaqil va shaffoflik prinsiplari asosida baholanadi.

 
2030-yilgacha davlat ro‘yxatidan o‘tish ixtiyoriy bo‘lib, maxsus imtihon orqali yoki malaka toifasi berilishi jarayonida avtomatik tarzda amalga oshiriladi. Ro‘yxatdan o‘tgan xodimga 5 yil muddatga tegishli maqom beriladi.

 
Avval berilgan malaka toifalari ham amal qilish muddati tugaguniga qadar saqlanadi. Ular asosida belgilangan ustamalar va lavozim bilan bog‘liq huquqlar ham o‘z kuchida qoladi.

 
2030-yildan keyin imtihondan o‘ta olmagan xodim ishidan chetlatilmaydi. Unga bir yil ichida qayta imtihon topshirish imkoniyati beriladi va shu davrda faoliyatini davom ettirishi mumkin.

 
Uch yil yoki undan ko‘proq vaqt davomida ishlamagan tibbiyot va farmatsevtika xodimlari uchun ham alohida tartib belgilanadi. Ular ixtisoslashuv kurslarini tamomlab, qayta davlat ro‘yxatidan o‘tishi mumkin. Agar avvalgi ro‘yxatdan o‘tish muddati tugamagan bo‘lsa, qayta imtihon topshirish talab etilmaydi.

 
Kamida 20 yillik ish stajiga ega va ilmiy darajasi bo‘lgan shifokorlar esa imtihonsiz davlat ro‘yxatidan o‘tkaziladi. Shu tariqa ularning uzoq yillik kasbiy tajribasi va ilmiy salohiyati hisobga olinadi.

 
Yangi tizim doirasida tibbiyot va farmatsevtika xodimlarining malakasini baholash jarayoni xalqaro standartlar asosida modernizatsiya qilinishi belgilangan.