Chorvoq suv omborida ota va uning ikki o‘g‘il cho‘kib ketdi
Hozirda qidiruv ishlari amalga oshirilmoqda.
2026-yil 2-sentyabr kuni Toshkent viloyati Bo‘stonliq tumani, «Burchmulla» MFY hududidagi Chorvoq suv omborida uch nafar fuqaro — ota va uning ikki o‘g‘li cho‘kib ketgan.
FVVga ko‘ra, ular katerda sayr qilish vaqtida suvga tushish taqiqlangan hududga borgan va qutqaruv nimchalarisiz suvga tushgan.
Hodisa haqida xabar kelib tushishi bilan FVVning g‘avvos-qutqaruvchilari voqea joyiga yetib borgan. Hozirda ular 2–2,5 kilometr radiusdagi hududda qidiruv ishlarini olib bormoqda. Qidiruvga zarur kuch va vositalar jalb etilgan.
FVV ma’lumotiga ko‘ra, suv omborining chuqurligi va qidiruv hududining kengligi ishlarni murakkablashtirmoqda.
Qidiruv ishlari FVV tomonidan to‘liq nazoratga olingan.
