Bo'stonliqda “Chiqindisiz tabiat” ekologik aksiyasi o'tkazildi
Aksiya davomida “Yoshlar oromgohi” hududi va unga tutash tabiiy maskanlar chiqindilardan tozalandi.
Toshkent viloyati Bo‘stonliq tumanidagi “Yoshlar oromgohi” hududida “Eko-oromgoh” dasturi doirasida “Chiqindisiz tabiat” shiori ostida ekologik aksiya tashkil etildi.
Unda respublikamizning turli hududlaridan tashrif buyurgan yosh ekologlar, eko-faollar hamda tabiatga befarq bo‘lmagan yoshlar faol ishtirok etdi.
Aksiya davomida oromgoh hududi va unga tutash tabiiy maskanlar chiqindilardan tozalandi. Ishtirokchilar tomonidan maishiy chiqindilar yig‘ilib, belgilangan tartibda saralandi va hududdan olib chiqildi.
Tadbirning asosiy maqsadi — yoshlar o‘rtasida ekologik madaniyatni yuksaltirish, tabiatga mas’uliyatli munosabatni shakllantirish, chiqindilarni belgilangan joylarga tashlash hamda atrof-muhitni asrash bo‘yicha jamoatchilik faolligini oshirishdan iborat.
Aksiya davomida yosh ekologlar o‘zaro tajriba almashib, tabiatni muhofaza qilish, chiqindilarni kamaytirish va ekologik toza muhit yaratish borasidagi tashabbuslarini namoyish etdilar.
“Chiqindisiz tabiat” kabi ekologik aksiyalar yosh avlodning tabiatga bo‘lgan mehrini kuchaytirish, ekologik mas’uliyatini oshirish va sog‘lom atrof-muhitni asrashga qaratilgan amaliy tashabbuslarni kengaytirishda muhim ahamiyat kasb etadi.
Rashida Norboyeva tayyorladi
