“Ekooromgoh–2026” dasturiga start berildi

Toshkent viloyatining Bo‘stonliq tumanida Ekologiya vazirligi tashabbusi bilan yoshlarning ekologik bilim va ko‘nikmalarini oshirish, ularning tabiatni muhofaza qilish borasidagi faolligini qo‘llab-quvvatlashga qaratilgan “Ekooromgoh–2026” dasturiga start berildi.

Dastur doirasida O‘zbekistonning turli hududlaridan tashrif buyurgan yosh ekologlar, eko-faollar va tabiatga befarq bo‘lmagan yoshlar ishtirok etmoqda.

“Ekooromgoh–2026”ning asosiy maqsadi — yosh avlodda ekologik madaniyatni shakllantirish, atrof-muhitni asrashga oid bilimlarini mustahkamlash, tabiatga mas’uliyatli munosabatni keng targ‘ib qilish hamda yosh ekologlarning tashabbuslarini qo‘llab-quvvatlashdan iborat.

Dastur davomida ishtirokchilar uchun ekologik targ‘ibot tadbirlari, amaliy mashg‘ulotlar, seminar va treninglar, tabiatni muhofaza qilishga qaratilgan aksiyalar hamda turli interaktiv loyihalar tashkil etilishi ko‘zda tutilgan.

Shuningdek, yosh ekologlarning jamoaviy tashabbuslarini rivojlantirish, o‘zaro tajriba almashish va ekologik muammolarga innovatsion yechimlar topishiga alohida e’tibor qaratiladi.

Dastur doirasida o‘tkazilgan ilk tadbirlardan biri sifatida “Chiqindisiz tabiat” ekologik aksiyasi tashkil etilib, unda turli viloyatlardan kelgan yosh ekologlar faol ishtirok etdi.

“Ekooromgoh–2026” dasturi yoshlarni tabiatni asrash yo‘lida birlashtirish, ularning ekologik tashabbuslarini ro‘yobga chiqarish va ekologik madaniyatni yuksaltirishga xizmat qiladi.

 

Rashida Norboyeva tayyorladi