Endi Toshkentdan Parkentga 50 daqiqada yetib borasiz
Parkent–Toshkent yo‘nalishida yangi elektropoyezd qatnovi yo‘lga qo‘yildi.
7 sentyabr kuni «Parkent – Toshkent – Parkent» yo‘nalishida zamonaviy shaharlararo elektropoyezd qatnovi yo‘lga qo‘yildi
Mazkur loyiha O‘zbekiston Prezidentining 2025 yil 27 yanvardagi PQ-28-son qarori asosida amalga oshirildi. Loyiha doirasida Toshkent viloyatidagi «Baytqo‘rg‘on – Parkent» yo‘nalishining 24 kilometrlik elektrlashtirilgan temir yo‘l liniyasi barpo etildi.
Shuningdek, loyiha doirasida 3 ta temir-beton ko‘prik, avtomobil yo‘l o‘tkazgichi, 76 ta suv o‘tkazish inshooti, 16 ta avtomobil va temir yo‘l kesishmasi hamda 50 o‘rinli “Parkent” temir yo‘l bekati qurilgan.
Yangi elektropoyezd 586 ta o‘rindiqqa ega bo‘lib, jami 1 154 nafargacha yo‘lovchini tashish imkoniyatiga ega. Parkentdan Toshkentgacha bo‘lgan safar vaqti 50 daqiqani tashkil etadi.
Yo‘lkira narxi kattalar uchun 10 ming so‘m, 10 yoshgacha bo‘lgan bolalar uchun esa 6,5 ming so‘m etib belgilangan.
Yangi transport qatnovi Parkent tumani aholisi uchun Toshkent bilan transport aloqalarini yaxshilash, yo‘lovchilar uchun qulay va tezkor harakatlanish imkoniyatini yaratishga xizmat qiladi.
Shuningdek, zamonaviy temir yo‘l infratuzilmasining ishga tushirilishi Parkentning turistik salohiyatini rivojlantirish, hududga sayyohlar oqimini oshirish hamda yangi ish o‘rinlari yaratishga qo‘shimcha imkoniyat yaratishi kutilmoqda.
