Maktablarda har dushanba kuni “Kelajak soati” darslari tashkil etilmoqda

Maktabgacha va maktab ta’limi vazirligi tizimidagi maktabgacha ta’lim tashkilotlari va umumta’lim maktablarida 2025–2026-o‘quv yilidan boshlab har dushanba kuni “Kelajak soati” darslarini o‘tkazish amaliyoti joriy etilgan.

 

Qayd etilishicha, mazkur mashg‘ulotlardan ko‘zlangan maqsad o‘quvchilarni milliy va umuminsoniy qadriyatlar ruhida tarbiyalash, ularda Vatanga muhabbat va sadoqat, milliy o‘zlikni anglash, ijtimoiy-emotsional ko‘nikmalar hamda ijobiy xulq-atvorni shakllantirishdan iborat.

 

Darslarga davlat va jamoat tashkilotlari vakillari, madaniyat va adabiyot sohasi vakillari, olimlar, pedagoglar, deputatlar hamda san’atkorlar jalb qilinmoqda.

 

Shuningdek, malakali ekspert va mutaxassislar ishtirokida turli mavzularda videokontentlar tayyorlanib, milliytarbiya.uz platformasiga joylashtirilmoqda. Bugungi kungacha platformaga 180 ta ssenariy asosida 410 ta videokontent joylashtirilgan.

 

Vazirlik tomonidan 2026–2027-o‘quv yili uchun ham “Kelajak soati” dasturi ishlab chiqilgan. Unda turli yosh guruhlari uchun alohida dars ishlanmalari, ssenariylar, vizual va interaktiv materiallar tayyorlangan.

 

Xususan, 3–7 yoshli maktabgacha ta’lim tarbiyalanuvchilari hamda 1–4, 5–8 va 9–11-sinf o‘quvchilari uchun alohida o‘quv dasturlari ishlab chiqilib, platformaga joylashtirilgan.

 

Vazirlik ma’lumotiga ko‘ra, mashg‘ulotlar davomida o‘quvchilar mavzuga oid ma’lumotlarni o‘rganish bilan birga, o‘z orzu-maqsadlari haqida fikr almashishi va qiziqtirgan savollariga javob olishi mumkin.

 

Darslarda tarixda iz qoldirgan ajdodlarning siyosat, ilm-fan va madaniyatdagi faoliyati, shuningdek, Vatan ravnaqi yo‘lidagi fidoyiligi haqida ham ma’lumotlar beriladi.

 

“Kelajak soati” darslarini samarali tashkil etish maqsadida vazirlikning hududiy bo‘linmalari mas’ul xodimlari, ta’lim tashkilotlari rahbarlari va pedagoglar uchun o‘quv-seminarlari ham o‘tkazib kelinmoqda.