Serbiya O‘zbekiston bilan ballistik raketalar ishlab chiqarishda hamkorlik qilishga tayyorligini ma’lum qildi
Aleksandr Vuchich Serbiya uzoq masofaga uchuvchi ballistik raketalar ishlab chiqarishni bir yil ichida boshlashi mumkinligini ma’lum qildi.
Serbiya Prezidenti Aleksandr Vuchich O‘zbekiston bilan mudofaa sanoati, jumladan, uzoq masofaga uchuvchi ballistik raketalar ishlab chiqarish sohasida hamkorlik qilishga tayyorligini bildirdi. Bu haqda u 8-sentyabr kuni Belgradda o‘tkazilgan O‘zbekiston-Serbiya biznes forumida ma’lum qildi.
Vuchichning so‘zlariga ko‘ra, Serbiya hozirda qisqa masofaga uchuvchi raketalarni ishlab chiqarmoqda. Mamlakat uzoq masofaga uchuvchi ballistik raketalarni ishlab chiqarishni bir yil ichida boshlashi mumkin.
Serbiya prezidenti mudofaa sanoatida texnologiyalar transferi bo‘yicha ishlar olib borilayotganini qayd etib, O‘zbekiston bilan ushbu yo‘nalishda hamkorlik qilish imkoniyati mavjudligini ta’kidladi.
Biznes forumda O‘zbekiston va Serbiyaning 200 nafardan ziyod rasmiylari hamda ishbilarmon doiralari vakillari, shuningdek, yirik sanoat va savdo korxonalari rahbarlari ishtirok etdi.
Mazkur forum O‘zbekiston Prezidenti Shavkat Mirziyoyevning Serbiyaga rasmiy tashrifi doirasida o‘tkazildi. Tashrif davomida ikki mamlakat o‘rtasida strategik sheriklik munosabatlarini o‘rnatish to‘g‘risida kelishuvga erishildi.
