Elektron auksionlar muddati ikki barobarga qisqartiriladi
Savdo haqidagi xabarnomani e’lon qilish muddati 30 kundan 15 kungacha tushiriladi.
O‘zbekistonda davlat aktivlarini realizatsiya qilish va xususiylashtirish jarayonlarini jadallashtirish maqsadida elektron onlayn-auksion va tanlov savdolarini tashkil etish tartibiga qator o‘zgartirishlar kiritilmoqda.
Yangi tartibga ko‘ra, elektron auksion va tanlov savdolari o‘tkazilishi to‘g‘risidagi rasmiy xabarnomani e’lon qilish muddati amaldagi 30 kundan 15 kungacha qisqartiriladi.
Shuningdek, dastlabki savdolarda sotilmay qolgan mulklar bo‘yicha takroriy auksionlarni o‘tkazish muddati ham qisqartiriladi. Bunda takroriy savdo to‘g‘risidagi xabarnoma 10 kun avval emas, balki 5 kun oldin e’lon qilinadi.
Natijada davlat aktivlarini qayta savdoga chiqarish va yakuniy realizatsiya qilish o‘rtasidagi vaqt ikki barobarga qisqaradi.
Qayd etilishicha, mazkur o‘zgarishlar davlat aktivlarini iqtisodiy aylanmaga tezroq jalb etish, xususiylashtirish jarayonlarini jadallashtirish hamda tadbirkorlar uchun qulay shart-sharoitlar yaratishga xizmat qiladi.
