Fransiyadagi muzeydan 9 million yevrolik kartinalar o‘g‘irlandi

Fransiyaning janubidagi Kan-syur-Mer shahrida joylashgan Pyer-Ogyust Renuar muzeyiga o‘g‘rilar bostirib kirib, rassomning to‘rtta asarini olib ketgan.

Tergovga yaqin manbaning BFMTV telekanaliga maʼlum qilishicha, jinoyatchilar muzeyga kirib, sanʼat asarlarini uch daqiqadan kamroq vaqt ichida olib chiqib ketgan.

O‘g‘rilar devorlardan «Madam Kolonna Romano portreti», «Quduqdagi yosh ayol», «Madam Stefan Pishon portreti» va «Koko o‘qishi» nomli kartinalarni yechib olgan. Keyinchalik so‘nggi ikki asar muzey bog‘idan topilgan. Qolgan ikki kartinaning qayerdaligi hozircha nomaʼlum.

Kan-syur-Mer meri Brian Massonning aytishicha, o‘g‘rilar qo‘lqop va niqob kiygan. Ularning muzey hududini yaxshi bilgani va kartinalarni devordan olib tashlash uchun metall arradan foydalangani qayd etilgan.

Mazkur holat yuzasidan Marsel prokuraturasi tomonidan «uyushgan guruh tomonidan sodir etilgan o‘g‘irlik» hamda jinoyat sodir etish maqsadida jinoiy tashkilotda ishtirok etish moddalari bo‘yicha tergov olib borilmoqda. Huquq-tartibot idoralari ikki gumonlanuvchini qidirmoqda.

O‘g‘irlangan sanʼat asarlarining umumiy qiymati taxminan 9 million yevroga baholanmoqda.

Maʼlumot uchun, avgust oyida Italiyaning Messina shahridagi hududiy muzeydan Uyg‘onish davri rassomi Antonello da Messinaga tegishli to‘rtta asar ham o‘g‘irlangan edi.