Yaqin Sharqdagi keskinlik fonida Brent nefti narxi 100 dollarga yaqinlashdi
Neft narxining oshishiga AQSh va Eron o‘rtasidagi qarama-qarshilikning kuchayishi sabab bo‘lmoqda.
Yaqin Sharqdagi keskinlikning kuchayishi fonida Brent markali neft narxi ketma-ket to‘rtinchi savdoda ham oshib, bir barrel uchun 100 dollarga yaqinlashdi.
"Interfaks" xabariga ko‘ra, 9-sentyabr kuni Londonning ICE Futures birjasida Brent neftining noyabr fyucherslari soat 08:20 holatiga 99,02 dollarni tashkil qilgan. Bu avvalgi savdo sessiyasi yakuniga nisbatan 1,1 dollar yoki 1,12 foizga ko‘p.
Bundan bir kun avval, 8-sentyabrda Brent fyucherslari 0,92 dollarga yoki 0,9 foizga qimmatlab, 97,92 dollar darajasida yopilgan.
Neft narxining oshishiga AQSh va Eron o‘rtasidagi qarama-qarshilikning kuchayishi sabab bo‘lmoqda. Eron Islom inqilobi qo‘riqchilari korpusi Iordaniyadagi Muvaffaq Salti aviabazasida joylashgan AQSh harbiylariga, shuningdek, AQSh harbiy-dengiz kuchlarining ikki esminetsiga raketa zarbalari berilganini ma’lum qilgan.
Avvalroq AQSh Markaziy qo‘mondonligi Fors va Ummon qo‘ltig‘ida beshta Eron neft tankerini yo‘q qilganini bildirgan. AQSh tomoni buni o‘z harbiy-dengiz kuchlari kemasiga uyushtirilgan hujumga javob chorasi sifatida izohlagan.
Shuningdek, 8-sentyabr kuni Yamandagi husiylar Saudiya Arabistonining janubidagi qator neft qazib olish obyektlariga hujum qilgan. Saudiya Arabistoni Energetika vazirligi ma’lumotiga ko‘ra, hujumlar oqibatida neft obyektlarida yong‘inlar yuzaga kelgan va ularning faoliyati vaqtincha to‘xtatilgan.
Shu bilan birga, Nyu-York tovar birjasida (NYMEX) oktyabr oyida yetkazib beriladigan WTI nefti narxi 0,97 dollarga yoki 1,04 foizga oshib, 94 dollarga yetgan. Avvalgi savdoda WTI 1,55 dollarga yoki 1,7 foizga qimmatlagan va 93,03 dollarni tashkil qilgan.
Brent nefti narxi avgust boshidan buyon qariyb chorak qismga oshgan.
Tahlilchilarga ko‘ra, Vashington va Tehron o‘rtasidagi muzokaralarning tez orada qayta tiklanishiga umidlarning susayishi hamda mintaqadagi harbiy harakatlarning davom etishi bozorda geosiyosiy xatarlar uchun qo‘shimcha narx ustamasini shakllantirmoqda.
