Alifbo o‘zgaradi: senatorlar qonun loyihasini ma’qulladi
Yangi tartibga ko‘ra, alifbo amaldagi 26 ta harf va 3 ta harf birikmasi o‘rniga 28 ta harf va bitta apostrofdan iborat bo‘ladi.
Oliy Majlis Senatining 19-yalpi majlisida “Lotin yozuviga asoslangan o‘zbek alifbosini joriy etish to‘g‘risida”gi qonunga o‘zgartirishlar kiritish haqidagi qonun muhokama qilindi.
Majlisda so‘nggi yillarda o‘zbek tilini rivojlantirish, uning davlat tili sifatidagi maqomini mustahkamlash hamda xalqaro nufuzini oshirish borasida tizimli ishlar amalga oshirilayotgani ta’kidlandi.
Qonun bilan lotin yozuviga asoslangan o‘zbek alifbosini takomillashtirish nazarda tutilgan. Unga ko‘ra, amaldagi 26 ta harf va 3 ta harf birikmasi o‘rniga 28 ta harf va bitta apostrofdan iborat alifbo belgilanadi.
Shuningdek, yangi alifboga o‘tish davrida fuqarolar va tashkilotlarning huquq hamda manfaatlarini hisobga olish maqsadida ayrim hujjatlar, milliy valyuta va qimmatli qog‘ozlarning amaldagi alifboda rasmiylashtirilgan shakllari Qonun kuchga kirgunga qadar muomalada bo‘lishiga imkon beriladi.
Davlat idoralari va tashkilotlarining ayrim ramziy belgilari, shuningdek, turli belgilar ham ulardan foydalanishga yaroqsiz holga kelgunga yoki belgilangan amal qilish muddati tugagunga qadar ishlatilishi mumkin.
Senatorlarning ta’kidlashicha, qonunning qabul qilinishi lotin yozuviga asoslangan o‘zbek alifbosi va imlo qoidalarini takomillashtirish, davlat tilidan foydalanish imkoniyatlarini kengaytirish hamda o‘zbek tilini raqamlashtirish jarayonlarini rivojlantirishga xizmat qiladi.
Muhokamalar yakunida qonun senatorlar tomonidan ma’qullandi.
