Boldirga yashirilgan 240 ming dollar
Toshkentda ikki nafar Qozog‘iston fuqarosi 240 ming AQSH dollarini boldirlariga yashirib, O‘zbekistondan olib chiqib ketishga uringan vaqtida ushlandi. Shuningdek, qalbaki 8400 dollarni 3800 dollarga sotishga urinish fosh etildi.
Davlat xavfsizlik xizmati Toshkent viloyati bo‘yicha boshqarmasi hamda Bojxona organlari xodimlari hamkorligida o‘tkazilgan tezkor tadbir davomida katta miqdordagi xorijiy valyutaning O‘zbekistondan noqonuniy olib chiqilishiga chek qo‘yildi.
Xususan, Toshkent tumanidagi “Navoiy” chegara-bojxona postida 2005 va 2009 yillarda tug‘ilgan ikki nafar Qozog‘iston fuqarosi shaxsiy ko‘rikdan o‘tkazilgan.
Tekshiruv davomida fuqarolardan biri oyoqlarining boldir qismiga skotch yordamida 160 ming AQSH dollari, ikkinchisi esa 80 ming AQSH dollarini yashirin tarzda bog‘lab, ularni qo‘shni davlat hududiga olib chiqib ketishga uringani aniqlangan.
Shuningdek, Davlat xavfsizlik xizmatining Toshkent shahar bo‘yicha boshqarmasi xodimlari tomonidan qalbaki xorijiy valyutani muomalaga kiritishga urinish bilan bog‘liq holat ham fosh etilgan.
Aniqlanishicha, Qibray tumanida yashovchi, 1999 yilda tug‘ilgan shaxs Turkiyadan olib kelingan 8 400 AQSH dollari miqdoridagi qalbaki valyutani foyda olish maqsadida muomalaga kiritishga uringan.
U Yunusobod tumanida yashovchi, 1997 yilda tug‘ilgan sherigi bilan oldindan til biriktirib, qalbaki pullarni shartli xaridorga 3 800 AQSH dollariga sotayotgan vaqtida ashyoviy dalillar bilan ushlangan.
Qayd etilishicha, mazkur holatlar yuzasidan jinoyat ishlari qo‘zg‘atilgan. Hozirda har ikki holat bo‘yicha tergov harakatlari olib borilmoqda.
