Eron bilan mojaro 2029-yilgacha cho‘zilishi mumkin — WSJ
Mojaro 2029 yil yanvarida AQSHning navbatdagi prezidenti lavozimiga kirishganidan keyin ham davom etishi mumkin.
AQSH maʼmuriyatining yuqori lavozimli vakillari Eron bilan davom etayotgan mojaro Donald Trampning prezidentlik muddati yakunlanguniga qadar hal etilmasligi mumkinligini bildirgan. Bu haqda The Wall Street Journal o‘z manbalariga tayanib xabar berdi.
Nashr manbalariga ko‘ra, AQSH vitse-prezidenti Jey Di Vens, Davlat kotibi Marko Rubio va boshqa yuqori martabali amaldorlar Oq uydagi uchrashuvlar davomida Trampga Eron harbiy harakatlar va blokadaga qaramay, Vashington bosimiga qarshilik ko‘rsatishda davom etishi mumkinligini aytgan.
Bunday ssenariyda mojaro 2029-yil yanvar oyida AQSHning navbatdagi prezidenti lavozimiga kirishganidan keyin ham davom etishi mumkin. WSJ taʼkidlashicha, Vens va Rubio Respublikachilar partiyasidan kelgusi prezidentlik saylovlarida ehtimoliy nomzodlar sifatida ko‘rilmoqda.
Nashrga ko‘ra, mojaroning uzoq davom etishi AQSH harbiy resurslariga tushadigan yukni oshirishi, shuningdek, 2028-yilgi prezidentlik saylovlari davrida global energiya bozorlarida uzoq muddatli uzilishlarga sabab bo‘lishi mumkin.
Shu bilan birga, Tramp maslahatchilariga mojaroni imkon qadar tezroq yakunlashdan manfaatdor ekanini muntazam ravishda bildirmoqda. WSJ maʼlumotlariga ko‘ra, mojaro allaqachon yettinchi oyga kirgan va 18 nafar amerikalik harbiy xizmatchining o‘limiga sabab bo‘lgan.
Biroq AQSH prezidenti Eronni uzoq muddat iqtisodiy bosim ostida ushlab turish strategiyasini ham qo‘llab-quvvatlamoqda. Bu yondashuv dengiz blokadasi va sanksiyalarni o‘z ichiga olishi mumkin.
