“Minnatdorlik tariqasida oldim” — pora bilan ushlangan sudya 6 yilga qamaldi
Sirdaryoda tadbirkorning iqtisodiy ishini uning foydasiga hal qilib berish evaziga 7,5 ming dollar olgan sudya, unga vositachilik qilgan bank mansabdoriga sud hukmi o‘qildi.
Sud hujjatiga ko‘ra, sobiq sudya tadbirkorning iqtisodiy ishini uning foydasiga hal qilib berish evaziga pul olgan.
Jinoyat ishi materiallariga ko‘ra, 39 yoshli E.S. Sirdaryo viloyati sudi iqtisodiy ishlar bo‘yicha sudyasi, 40 yoshli D.T. esa “Agrobank”ning Guliston filiali boshqaruvchisi o‘rinbosari lavozimida ishlagan. Ular avvaldan tanish bo‘lgan.
Guliston tumanlararo iqtisodiy sudining MCHJlardan biriga tegishli avtostansiya binosini buzish haqidagi hal qiluv qaroridan norozi bo‘lgan jamiyat rahbari viloyat sudining iqtisodiy ishlar bo‘yicha sudlov hayʼatiga kassatsiya shikoyati kiritgan.
Tergov maʼlumotlariga ko‘ra, D.T. ushbu MCHJ rahbari bilan tanish bo‘lganidan foydalanib, unga sud ishini ijobiy hal qilishni taklif qilgan. Buning evaziga 8 ming dollar talab qilingan.
Shundan so‘ng E.S. sud muhokamasini qonunga xilof ravishda besh marotaba qoldirgan. 2026 yil 6 aprel kuni D.T. MCHJ rahbaridan 2 ming dollar olgan.
2026-yil 9-aprel kuni esa sudya pul mablag‘lari to‘liq berilmaganini sabab qilib, yetarli asoslarsiz sud muhokamasiga tanaffus eʼlon qilgan.
Oradan to‘rt kun o‘tib, 13-aprel kuni D.T. MCHJ rahbaridan yana 5,5 ming dollar olgan. Shundan so‘ng E.S. birinchi instansiya sudining noqonuniy qurilishni buzdirish haqidagi qarorini bekor qilib, ishni MCHJ rahbari foydasiga hal qilgan.
Olingan 7,5 ming dollar o‘zaro taqsimlangan. Tezkor tadbir davomida mablag‘larning 3,6 ming dollari E.S.dan, 3,9 ming dollari esa D.T.dan ashyoviy dalil sifatida hujjatlashtirib olingan.
Sud majlisida E.S. aybiga qisman iqror bo‘lgan. U olgan pullarini pora sifatida emas, moddiy rag‘bat va minnatdorlik sifatida qabul qilganini bildirgan.
Sobiq sudyaning taʼkidlashicha, D.T. unga MCHJ rahbarining tanishi ekanini va birinchi instansiya sudining qarori noqonuniy chiqarilganini aytgan. E.S. kassatsiya shikoyatini ish yurituviga qabul qilganini, biroq keyinchalik birinchi instansiya qarorini bekor qilishga kassatsiya shikoyatida keltirilgan vajlar asos bo‘lmaganini ham tan olgan.
Uning so‘zlariga ko‘ra, 13-aprel kuni D.T. sud binosi yaqinida uchrashib, jamiyat rahbari minnatdorchilik bildirganini aytgan va pul bergan. E.S. ushbu mablag‘ni pora emas, “minnatdorchilik tariqasida” olganini bildirgan.
Sobiq sudya o‘z harakatlarida tamagirlik alomatlari yo‘qligini taʼkidlab, ishni firibgarlik moddasi bilan qayta malakalashni va ozodlikdan mahrum qilish bilan bog‘liq bo‘lmagan jazo tayinlashni so‘ragan.
D.T. ham aybiga qisman iqror bo‘lib, pul berish taklifi MCHJ rahbarining o‘zidan chiqqanini bildirgan.
Jizzax viloyati sudining jinoyat ishlari bo‘yicha sudlov hayʼati hukmiga ko‘ra, E.S. Jinoyat kodeksining 210-moddasi 2-qismi “v” bandi, D.T. esa 28 va 210-moddalari 2-qismi “v” bandida nazarda tutilgan jinoyatni sodir etishda aybdor deb topilgan.
E.S.ga 3 yil muddatga sud va huquqni muhofaza qiluvchi organlarda ishlash huquqidan mahrum qilgan holda 6 yil ozodlikdan mahrum qilish jazosi tayinlangan.
D.T. esa 3 yil muddatga bank tizimi hamda davlat ishtirokidagi korxona, muassasa va tashkilotlarda ishlash huquqidan mahrum qilinib, 5 yil 6 oy muddatga ozodlikdan mahrum qilingan.
