O‘zbekistonda valyuta kursini shakllantirish tartibi o‘zgartiriladi
15-sentabrdan rasmiy almashuv kursini hisoblashda valyuta birjasidan tashqari banklararo bozorda tuzilgan bitimlar ham inobatga olinadi.
O‘zbekiston Markaziy banki 2026-yil 15-sentabrdan ichki valyuta bozorida almashuv kursini shakllantirish va e’lon qilish amaliyotlari takomillashtirilishini ma’lum qildi.
Yangi tartibga ko‘ra, Markaziy bankning rasmiy valyuta almashuv kurslari faqat valyuta birjasidagi bitimlar asosida emas, balki banklararo birjadan tashqari bozorda tuzilgan bitimlar ham hisobga olingan holda shakllantiriladi.
Xususan, rasmiy kurs birja va birjadan tashqari bozorda tuzilgan bitimlarning o‘rtacha tortilgan kursi asosida hisoblanadi. Markaziy bankning qayd etishicha, bu rasmiy almashuv kursini hisoblashda ichki valyuta bozoridagi bitimlarni kengroq qamrab olish va bozor holatini yanada aniq aks ettirish imkonini beradi.
Shuningdek, dam olish kunlari, jumladan shanba va yakshanba kunlari uchun oxirgi ish kunida rasmiy e’lon qilingan valyuta kurslaridan foydalanish amaliyotiga o‘tiladi.
