Saida Mirziyoyevaga qo‘shimcha vazifa yuklatildi
Prezident Administratsiyasi rahbari Toshkent xalqaro moliya markazi boshqaruvchisi etib tayinlandi.
Prezidenti farmoni bilan Prezident Administratsiyasi Rahbari Saida Shavkatovna Mirziyoyeva hozirgi lavozimi bilan o‘rindoshlik asosida Toshkent xalqaro moliya markazi boshqaruvchisi lavozimiga tayinlandi.
Qayd etilishicha, boshqaruvchi Moliya markazi kengashining Bosh kotibi hisoblanadi. U Kengash majlislari kun tartibini shakllantirishni tashkil etadi hamda rais qatnashmagan yig‘ilishlarda ularga raislik qiladi.
Markaz faoliyatini yo‘lga qo‘yish va uning ishini muvofiqlashtirish boshqaruvchining asosiy vazifalaridan biri bo‘ladi. Jumladan, dastlabki hujjatlarni tayyorlash, davlat organlari va Markaz tuzilmalari o‘rtasidagi hamkorlikni tashkil etish uning vakolatlariga kiradi.
Shuningdek, boshqaruvchi Moliya markazi nomidan O‘zbekiston va xorijda xalqaro tashkilotlar, investorlar hamda hamkorlar bilan munosabatlarda Markaz manfaatlarini ifodalaydi.
U kadrlar masalalari bo‘yicha qarorlar qabul qilishda ham ishtirok etadi. Xususan, Moliya markazi ma’muriyatining ijrochi direktori va uning o‘rinbosarlarini tayinlash, shuningdek, Moliyaviy xizmatlar boshqarmasi rahbariyati bo‘yicha tavsiyalar kiritish vakolatiga ega.
Boshqaruvchiga bitimlar tuzish, ishchi guruhlar tashkil etish hamda zarur hollarda ekspertlarni jalb qilish huquqi ham berilgan.
