Yo‘lkira haqini to‘lamagan 4 696 nafar yo‘lovchiga bayonnoma rasmiylashtirildi
Toshkentda sentabr oyining dastlabki sakkiz kunida yo‘lkira haqini to‘lamagan 4 696 nafar yo‘lovchiga nisbatan maʼmuriy bayonnomalar rasmiylashtirildi. Bu avgust oyidagi kunlik o‘rtacha ko‘rsatkichdan qariyb 68 foizga ko‘p.
2026-yil 1-sentabrdan boshlab brutto-shartnoma asosida faoliyat yuritayotgan barcha shahar avtobuslarida yo‘lkira haqini to‘lashning yangi tartibi joriy etildi. Unga ko‘ra, yo‘lovchi avtobusga chiqishi bilan yo‘lkira haqini to‘lashi shart.
Shu munosabat bilan «Toshkent shahar yo‘lovchi tashishni monitoring va nazorat qilish» davlat muassasasi nazoratchilari tomonidan jamoat transportida yo‘lkira haqini to‘lash tartibiga rioya etilishini taʼminlash maqsadida kuchaytirilgan nazorat reydlari o‘tkazilmoqda.
Maʼlumotlarga ko‘ra, avgust oyida yo‘lkira haqini to‘lamasdan harakatlangan 10 843 nafar yo‘lovchiga nisbatan Maʼmuriy javobgarlik to‘g‘risidagi kodeksning 144-moddasi 5-qismiga asosan maʼmuriy bayonnomalar rasmiylashtirilgan. Bu kuniga o‘rtacha 350 ta holatni tashkil etgan.
Sentyabr oyining dastlabki sakkiz kunida esa 4 696 nafar yo‘lovchiga nisbatan maʼmuriy bayonnomalar tuzilgan. Mazkur davrda kuniga o‘rtacha 587 ta holat qayd etilgan.
Shunday qilib, sentyabr oyining dastlabki sakkiz kunida kuniga o‘rtacha rasmiylashtirilgan maʼmuriy bayonnomalar soni avgust oyidagi ko‘rsatkichga nisbatan 237 taga yoki qariyb 68 foizga oshgan.
