Erta nikohga yangi cheklov: endi qonun faqat ikki sababni tan oladi

 

O‘zbekistonda nikoh yoshiga oid tartiblarni yanada takomillashtirish va erta nikohlarning oldini olishga qaratilgan yangi qonun loyihasi ishlab chiqildi.

 

Bu haqda 11-sentabr kuni Oliy Majlis Senatining majlisida Bosh vazir o‘rinbosari — Oila va xotin-qizlar qo‘mitasi raisi Dilnoza Kattaxonova ma’lum qildi.

 

Qayd etilishicha, Oila kodeksining 15-moddasiga o‘zgartirish kiritishni nazarda tutuvchi qonun loyihasi ishlab chiqilib, Prezident Administratsiyasiga kiritilgan. Unga ko‘ra, nikoh yoshini ko‘pi bilan bir yilga kamaytirishga faqat ikki holatda — homiladorlik va bola tug‘ilganida ruxsat berilishi belgilanmoqda.

 

Amaldagi tartibda esa nikoh yoshini kamaytirish uchun homiladorlik, bola tug‘ilishi hamda voyaga yetmagan shaxsning to‘la muomala layoqatiga ega deb e’lon qilinishi (emansipatsiya) kabi holatlar asos bo‘lishi mumkin.

 

Yangi tartib joriy etilgach, emansipatsiya holati nikoh yoshini kamaytirish uchun asos sifatida Oila kodeksidan chiqarib tashlanishi kutilmoqda.

 

Shuningdek, 18 yoshga to‘lmagan shaxslarning nikoh uchun onlayn ariza berishida avtomatik cheklov o‘rnatilishi, faqat tuman yoki shahar hokimining tegishli qarori kiritilgandan keyingina ariza topshirish imkoniyati yaratilishi aytildi.

 

Qonun loyihasida erta nikohga sabab bo‘luvchi va uni targ‘ib qiluvchi shaxslarga nisbatan javobgarlik choralarini kuchaytirish ham nazarda tutilmoqda. Jumladan, erta nikohni birinchi marta targ‘ib qilganlik uchun bazaviy hisoblash miqdorining 10 baravari miqdorida jarima qo‘llash taklif etilmoqda.

 

Majlisda joriy yil davomida xotin-qizlar faollari xabarlari asosida respublika bo‘yicha 348 ta erta nikohning oldi olingani ham ma’lum qilindi.

 

Mazkur o‘zgartirishlar erta nikohlarning oldini olish, nikoh munosabatlarini qonunchilik asosida tartibga solish hamda voyaga yetmaganlarning huquq va manfaatlarini himoya qilishga qaratilgan.