2 200 dollar evaziga “Umra”: firma vakillari qo‘lga tushdi
Farg‘ona va Namanganda fuqarolarni noqonuniy ravishda “Umra” ziyoratiga yuborishni vaʼda qilib, pul talab qilgan sayyohlik firmasi vakillari qo‘lga olindi.
Huquqni muhofaza qiluvchi organlar tomonidan fuqarolarni tegishli litsenziyasiz “Umra” ziyoratiga yuborish bilan bog‘liq noqonuniy holatlarning oldini olish bo‘yicha tezkor tadbirlar o‘tkazilmoqda.
Jumladan, Farg‘ona viloyatining Qo‘qon shahrida faoliyat yurituvchi sayyohlik firmasi rahbari ikki nafar fuqaroni “Umra” ziyoratiga yuborishni vaʼda qilib, buning evaziga 2 200 AQSH dollari talab qilgani aniqlangan.
Davlat xavfsizlik xizmati hamda ichki ishlar organlari xodimlari hamkorligida o‘tkazilgan tezkor tadbir davomida firma rahbari so‘ralgan pul mablag‘ini olayotgan vaqtida ashyoviy dalillar bilan ushlangan.
Shuningdek, Namangan viloyatining Chortoq tumanida faoliyat yurituvchi sayyohlik firmasi xodimi ham ikki nafar fuqaroni “Umra” safariga yuborishni vaʼda qilib, 2 200 AQSH dollari talab qilgani maʼlum bo‘lgan. U oldindan 400 AQSH dollarini olgan vaqtida DXX va IIB xodimlari tomonidan ushlangan.
Mazkur holatlar yuzasidan tegishli shaxslarga nisbatan jinoyat ishlari qo‘zg‘atilib, hozirda tergov harakatlari olib borilmoqda.
