625 grammlik “yuk”: uch holat fosh etildi
Xorazm va Jizzaxda o‘tkazilgan tezkor tadbirlarda giyohvandlik vositalari yashirilgan uchta holat fosh etildi.
Birinchi holatda Davlat xavfsizlik xizmatining Xorazm viloyati bo‘yicha boshqarmasi, viloyat Ichki ishlar hamda Bojxona boshqarmalari xodimlari hamkorligida Tuproqqal’a tumanida tezkor tadbir o‘tkazilgan.
Tadbir davomida “Surxondaryo – Xorazm” yo‘nalishida harakatlanayotgan “Lasetti” rusumli avtomobil to‘xtatilib, tekshirilganda yo‘lovchi sifatida ketayotgan, Angor tumanida yashovchi, 1960-yilda tug‘ilgan, muqaddam giyohvandlik vositalari bilan bog‘liq jinoyati uchun ikki marotaba sudlangan shaxsga tegishli sellofan paketdan 490 gramm “opiy” moddasi aniqlangan.
Dastlabki ma’lumotlarga ko‘ra, mazkur giyohvandlik vositasi qo‘shni davlatdan kontrabanda yo‘li bilan olib kirilib, Xorazm viloyatida sotilishi rejalashtirilgan.
Ikkinchi holatda “Toshkent – Xorazm” yo‘nalishida harakatlanayotgan “Oniks” rusumli avtomobil yo‘lovchisi — Urganch shahrida yashovchi, 1968-yilda tug‘ilgan shaxsning yonidan 119 gramm “gashish” moddasi topilib, ashyoviy dalil sifatida olingan.
Uchinchi holat DXX Jizzax viloyati bo‘yicha boshqarmasi hamda viloyat IIB xodimlari hamkorligida Sirdaryo viloyatining Oqoltin tumanida o‘tkazilgan tezkor tadbir davomida aniqlangan.
“Sirdaryo – Jizzax” yo‘nalishida harakatlanayotgan “Lasetti” rusumli avtomobil to‘xtatilib, haydovchi — Jizzax shahrida yashovchi, 1974-yilda tug‘ilgan, muqaddam giyohvandlik vositalari bilan bog‘liq jinoyati uchun sudlangan shaxs tekshirilgan.
Tekshiruv vaqtida uning oyoq kiyimi ichiga 16 gramm “opiy” moddasi yashirilgani aniqlanib, ashyoviy dalil sifatida olib qo‘yilgan.
Mazkur holatlar yuzasidan tegishli shaxslarga nisbatan jinoyat ishlari qo‘zg‘atilgan. Hozirda dastlabki tergov harakatlari olib borilmoqda.
