“75 maktub” ishi: Tashiyevga qo‘yilgan ayblov o‘zgartirildi

 

Bishkek shahar sudi “75 maktub” ishi bo‘yicha sudlanuvchilarga nisbatan chiqarilgan hukmni o‘zgartirdi. Jumladan, Qirg‘iziston Milliy xavfsizlik davlat qo‘mitasining sobiq raisi Qamchibek Tashiyevga qo‘yilgan “hokimiyatni kuch bilan egallash” ayblovi olib tashlanib, uning o‘rniga “saylov huquqlarini amalga oshirishga to‘sqinlik qilish” moddasi qo‘llandi.

 

10-sentabr kuni Bishkek shahar sudida ish bo‘yicha hukm e’lon qilindi. Sud barcha sudlanuvchilarni 4 yilga ozodlikdan mahrum qilishga hukm qilgan, biroq ularga 2 yil muddatga probatsiya nazoratini belgilagan. Shu sababli ular qamoqqa olinmaydi.

 

Sud, shuningdek, yangi qo‘llangan modda bo‘yicha mol-mulkni musodara qilish jazosi nazarda tutilmaganini qayd etgan.

 

Avvalroq, 2-iyul kuni Bishkekning Pervomayskiy tuman sudi “75 maktub” ishi bo‘yicha hukm chiqargan edi. O‘shanda Qamchibek Tashiyev, parlamentning sobiq raisi Nurlanbek Turg‘unbek va sobiq deputat Kurmankul Zulushev “hokimiyatni kuch bilan egallab olish” moddasi bo‘yicha aybdor deb topilib, 4 yilga ozodlikdan mahrum qilingan va ularga 3 yillik probatsiya nazorati belgilangan.

 

Ish bo‘yicha boshqa sudlanuvchilar ham 4 yilga ozodlikdan mahrum qilingan, biroq ularga nisbatan shartli jazo qo‘llangan.

 

7-sentabr kuni bo‘lib o‘tgan sud majlisida prokurorlar barcha sudlanuvchilarga 9 yilgacha ozodlikdan mahrum qilish jazosi tayinlashni so‘ragan edi.

 

Mazkur ish 9-fevral kuni 75 nafar sobiq bosh vazir, parlament sobiq a’zolari, siyosatchilar va jamoat arboblari tomonidan prezident Sadir Japarov hamda o‘sha paytdagi parlament spikeri Nurlanbek Turg‘unbekka muddatidan oldin prezidentlik saylovlarini o‘tkazish taklifi bilan murojaat qilingani ortidan yuzaga kelgan.

 

Keyinchalik murojaatga qo‘shilgan ayrim shaxslar uning mazmunini o‘qimasdan imzo qo‘yganini bildirgan.

 

10-fevral kuni Sadir Japarov Qamchibek Tashiyevni Vazirlar Mahkamasi raisi o‘rinbosari va Milliy xavfsizlik davlat qo‘mitasi raisi lavozimlaridan ozod qilgan edi.