Eron ballistik raketalar ishlab chiqarishni qayta boshlagani aytilmoqda — WSJ
Eronda ballistik raketalar ishlab chiqarish qayta tiklangani haqida xabarlar tarqaldi. Maʼlumotlarga ko‘ra, mamlakatning ayrim yerosti inshootlarida raketa yig‘ish ishlari olib borilmoqda.
Eron AQSH va Isroilning harbiy zarbalari ortidan ballistik raketalar ishlab chiqarishni qayta tiklagan bo‘lishi mumkin. Bu haqda AQSH va Yaqin Sharq rasmiylariga tayangan holda «The Wall Street Journal» xabar berdi.
Nashr maʼlumotlariga ko‘ra, Eron yerosti inshootlarida zaxirada saqlangan qismlardan suyuq va qattiq yoqilg‘ili ballistik raketalarni yig‘ish bilan shug‘ullanmoqda. Razvedka maʼlumotlarida mamlakatdagi bir nechta yerosti obyektlarida, jumladan, janubi-sharqda joylashgan Xojir raketa majmuasida faollik kuzatilayotgani qayd etilgan.
Rasmiylarning aytishicha, Tehron kelgusida yangi zarbalarga duch kelmaslik uchun qo‘shimcha yerosti yig‘ish obyektlarini barpo etishga ham urinmoqda.
Nashrga ko‘ra, raketa ishlab chiqarishning qayta tiklanishi Eronning raketa dasturini to‘liq yo‘q qilish qanchalik qiyin ekanini ko‘rsatadi.
AQSH rasmiylaridan birining aytishicha, Eronda mavjud qismlardan kamida bir necha yuzta raketa yig‘ish imkoniyati bo‘lishi mumkin. Shu bilan birga, mamlakat urush davomida tayyor raketa zaxiralarining bir qismini sarflagani sababli hujumlar ko‘lami qisqargan.
AQSH rasmiylari Eronning raketa va dron ishlab chiqarish imkoniyatlari sezilarli darajada zaiflashtirilganini bildirgan. Biroq ekspertlar Tehronning raketa dasturi hali ham katta salohiyatga ega ekanini taʼkidlamoqda.
Jumladan, AQSHdagi Missile Defense Advocacy Alliance tashkiloti tahlilchisi Tal Inbarning fikricha, zarbalar to‘xtagan paytda shikastlangan infratuzilmani tiklash va zarur qismlarni to‘plash imkoni mavjud.
Isroil bosh vaziri idorasi va Oq uy vakillari «The Wall Street Journal»ning Eron raketa ishlab chiqarishni qayta boshlagani haqidagi so‘roviga javob bermagan.
Ayni paytda Eron Yaqin Sharqdagi AQSH bazalariga raketa hujumlarini davom ettirayotgani xabar qilinmoqda. Bu esa mamlakatda turli xil ballistik raketalarni ishlab chiqarish va qo‘llash salohiyati saqlanib qolayotganini ko‘rsatishi mumkin.
