Kongodagi maktab yong‘inida kamida 24 o‘quvchi halok bo‘ldi
Yong‘in oqibatida 300 ga yaqin uy ham vayron bo‘lgan.
Kongo Demokratik Respublikasining sharqidagi Bukavu shahrida ikki maktabni qamrab olgan yong‘in oqibatida kamida 24 nafar o‘quvchi halok bo‘lgani taxmin qilinmoqda.
Reuters xabariga ko‘ra, yong‘in Bukavuning aholi zich joylashgan Kadutu hududida yuz bergan. O‘quvchilar yong‘indan qochishga uringan vaqtida halok bo‘lgan. Voqea oqibatida kattalar ham vafot etgani haqida xabar berilgan.
Yong‘indan jabrlanganlar yaqin atrofdagi shifoxonalarga olib ketilgan. Voqea joyidagi ma’lumotlarga ko‘ra, yong‘in oqibatida 300 ga yaqin uy ham vayron bo‘lgan. Qurbonlar soni yana ortishi mumkin.
Hozircha yong‘inning kelib chiqish sababi ma’lum emas. Hududdagi mahalliy rasmiylar vaziyatni o‘rganmoqda va qurbonlar soni bo‘yicha qo‘shimcha ma’lumotlar kutilmoqda.
Bukavu — Janubiy Kivu viloyatining ma’muriy markazi bo‘lib, shahar hozirda M23 isyonchi guruhi nazorati ostida. Mintaqadagi murakkab xavfsizlik vaziyati voqea oqibatlarini bartaraf etish ishlarini ham qiyinlashtirmoqda.
