Reysingiz kechikdimi? Endi sizga kompensatsiya to‘lanishi mumkin
Raqobat qo‘mitasiga havo transporti xizmatlari bo‘yicha murojaatlar soni yilning birinchi yarmida 4,1 baravarga oshgan.
Raqobat qo‘mitasi mahalliy aviakompaniyalar aybi bilan reyslar kechikkan holatlarda yo‘lovchilarga kompensatsiya to‘lanishi va isteʼmolchilar huquqlariga rioya etilishini o‘rganmoqda.
Qo‘mita maʼlumotiga ko‘ra, 2026 yilning birinchi yarmida havo transporti xizmatlari bo‘yicha isteʼmolchilardan 300 dan ortiq murojaat kelib tushgan. Bu o‘tgan yilning mos davriga nisbatan 4,1 baravar ko‘p.
Murojaatlarda reyslarning bir necha soatga kechikishi, yo‘lovchilarga o‘z vaqtida aniq maʼlumot berilmasligi, xizmatlarning sifatsiz ko‘rsatilishi hamda amalda taqdim etilmagan xizmatlar uchun haq olinishi kabi holatlar qayd etilgan.
Qo‘mita o‘tkazgan tahlillarga ko‘ra, ayrim hollarda tashuvchining aybi bilan kechikkan reyslar bo‘yicha yo‘lovchilarga kompensatsiya yoki muqobil yechim taklif qilinmagan. Bunday holatlar fuqarolarning vaqti, mablag‘i va rejalari buzilishiga olib kelayotgani qayd etilgan.
Hozirda qo‘mita mahalliy aviakompaniyalarning tashuvchining aybi bilan kechikkan reyslar uchun yo‘lovchilarga kompensatsiya to‘lashi hamda isteʼmolchilar huquqlariga rioya etishi bilan bog‘liq holatlarni ochiq manbalar asosida o‘rganmoqda.
Qo‘mita aviakompaniyalardan raqamli platformalaridagi maʼlumotlarni to‘liq taqdim etish va ularni amaldagi qonunchilikka muvofiqlashtirishni so‘ragan. Fuqarolarga esa ushbu sohadagi taklif va eʼtirozlarini Raqobat qo‘mitasiga yuborish tavsiya etilgan.
