Rossiyada migrantlarga yangi talab: ishlamaydigan oila aʼzosi ham soliq to‘laydi

2027-yil 1-yanvardan Rossiyada ishlayotgan xorijiy fuqarolar mamlakatda yashayotgan har bir ishlamaydigan oila aʼzosi uchun soliq to‘lashi belgilandi. Bu haqda Rossiya Ichki ishlar vazirligi vazirining birinchi o‘rinbosari, Fuqarolik va xorijiy fuqarolarni ro‘yxatga olish xizmati rahbari Andrey Kikot maʼlum qildi.

Uning so‘zlariga ko‘ra, mazkur chora Rossiyaning davlat migratsiya siyosati doirasida migrantlarning ishlamaydigan oila aʼzolarining mamlakatda qolishini cheklashga qaratilgan.

Kikotning qayd etishicha, migrant bolalarni Rossiya maktablariga qabul qilish bo‘yicha joriy etilgan talablar natijasida mamlakatda yashayotgan ishlamaydigan oila aʼzolari soni 1,7 milliondan qariyb 20 foizga kamaygan.

Shuningdek, Rossiyada xorijiy ishchilarni maqsadli va uyushgan tarzda yollash tizimini joriy etish rejalashtirilmoqda. Tegishli qonun loyihasi ayni paytda hukumat tomonidan ko‘rib chiqilmoqda.

Yangi tizimga ko‘ra, ish beruvchi migratsiya xizmatiga xorijiy ishchi kuchiga ehtiyoj bo‘yicha ariza beradi. Shundan so‘ng maxsus operator ishchilarni tanlab, ularni Rossiyaga olib keladi. Mehnat shartnomasi muddati tugagach, migrant o‘z vataniga qaytarilishi ko‘zda tutilgan.

Yirik va o‘rta biznes vakillari esa bunday ishchilarni turar joy hamda ish joyiga yetib borish uchun transport bilan taʼminlashi shart bo‘ladi.

Maʼlumot uchun, 2026-yil iyun oyida Rossiya Prezidenti Vladimir Putin migratsiya sohasidagi davlat bojlarini oshirishni nazarda tutuvchi qonunni maʼqullagan.

2025-yil bahorida Rossiya Ichki ishlar vazirligi Migratsiya masalalari bosh boshqarmasi tarkibida Andrey Kikot rahbarligida xorijiy fuqarolar bilan bog‘liq masalalar bo‘yicha alohida xizmat tashkil etilgan.