26 ming dollarlik “gashish” bitimi: xaridor o‘rniga tezkor xodimlar keldi
Qo‘lga olingan shaxslarning avval ham giyohvandlik jinoyati uchun sudlangani aniqlangan.
Giyohvandlik vositalarining noqonuniy aylanmasiga qarshi kurashish doirasida Toshkent shahrida yirik miqdordagi narkotik moddaning noqonuniy savdosiga chek qo‘yildi.
Davlat xavfsizlik xizmatining Qoraqalpog‘iston Respublikasi bo‘yicha boshqarmasi, Bojxona va Ichki ishlar organlari xodimlari hamkorligida o‘tkazilgan tezkor tadbirda qo‘shni davlatdan olib kirilgan 1 kg 185 gramm “gashish” moddasi musodara qilindi.
Aniqlanishicha, Surxondaryo viloyatining Denov shahrida yashovchi, 1988-yilda tug‘ilgan, muqaddam giyohvandlik vositalari bilan bog‘liq jinoyat uchun sudlangan shaxs Yakkasaroy tumanidagi mehmonxonalardan birida mazkur giyohvandlik vositasini shartli xaridorga 26 ming AQSH dollariga sotishga kelishgan.
U kelishilgan pulning 21 ming AQSH dollarini olgan vaqtida ashyoviy dalillar bilan ushlangan.
Shuningdek, giyohvandlik vositasini Surxondaryodan Toshkentga olib kelgan “Cobalt” rusumli avtomobil haydovchisi — 1987-yilda tug‘ilgan, Denov shahrida yashovchi, muqaddam o‘g‘rilik bilan bog‘liq jinoyat uchun sudlangan shaxs ham qo‘lga olingan.
Mazkur holat yuzasidan ushbu shaxslarga nisbatan jinoyat ishi qo‘zg‘atilib, tergov harakatlari olib borilmoqda.
