Dars o‘rniga janjal: tekshiruv boshlandi
Qarshidagi maktabda o‘quvchilar janjali yuzasidan surishtiruv boshlandi.
Qarshi shahridagi 1-sonli umumiy o‘rta taʼlim maktabida o‘quvchilar o‘rtasida janjal yuz berdi. Holat aks etgan video ijtimoiy tarmoqlarda tarqaldi.
Qashqadaryo viloyati Maktabgacha va maktab taʼlimi boshqarmasi maʼlumotiga ko‘ra, dastlabki o‘rganishlar davomida videodagi voqea ishtirokchilari aniqlangan.
Huquqni muhofaza qiluvchi organlar tomonidan o‘quvchilar va ularning ota-onalaridan tushuntirishlar olingan. Shuningdek, janjalning kelib chiqish sabablari hamda ishtirokchilar o‘rtasidagi munosabatlar o‘rganilgan.
Holatga huquqiy baho berish uchun tegishli hujjatlar Qarshi shahar IIBga yuborilgan. Hozirda vakolatli organlar tomonidan surishtiruv ishlari olib borilmoqda.
Surishtiruv yakunlari asosida holatga qonunchilikda belgilangan tartibda huquqiy baho beriladi. O‘rganish jarayoni viloyat Maktabgacha va maktab taʼlimi boshqarmasi tomonidan nazoratga olingan.
