“G‘amxo‘rlik” markazidagi ikki o‘lim: Agentlik tibbiy hujjatlarni ochiqladi

Ijtimoiy tarmoqlarda Toshkent shahridagi “G‘amxo‘rlik” markazlarida nogironligi bo‘lgan bolalarga tibbiy xizmat ko‘rsatish bilan bog‘liq muammolar, jumladan, 2-son “G‘amxo‘rlik” markazida ikki nafar bolaning vafoti haqida murojaat eʼlon qilindi.

Mazkur murojaat Ijtimoiy himoya milliy agentligi tomonidan o‘rganilib, mavjud tibbiy hujjatlar tahlil qilingan.

Agentlik maʼlumotiga ko‘ra, murojaatda ikki bolaning vafoti ularning sog‘lig‘i yetarli darajada nazorat qilinmagani bilan bog‘liq ekani haqida fikr bildirilgan.

O‘rganish davomida 2007-yilda tug‘ilgan bola 2026-yil 11-iyun kuni o‘tkir jarrohlik kasalligi belgilari bilan shifoxonaga yotqizilgani aniqlangan. U 9 kun davomida davolangan va 20-iyun kuni vafot etgan.

2016-yilda tug‘ilgan ikkinchi bola esa uzoq vaqt davomida surunkali o‘pka kasalligi bo‘yicha davolangan. 25-iyul kuni kasalligi zo‘raygani sababli shifoxonaga yuborilgan va tibbiyot muassasasida vafot etgan.

Mazkur holatlar qayd etilgan davrda 2-son “G‘amxo‘rlik” markazida 14 nafar shifokor va 28 nafar hamshira faoliyat yuritgan. Shifokorlar shtatini optimallashtirish jarayoni 2026-yil 25-avgustda yakunlangan. Ayni paytda markazda shifokorlar uchun 2 ta shtat birligi, hamshiralar uchun esa 30,5 ta shtat birligi mavjud.

Tibbiyot xodimlari bolalarning sog‘lig‘i holatini muntazam kuzatish, zarur hollarda birlamchi tibbiy yordam ko‘rsatish hamda ularni tibbiyot muassasalariga o‘z vaqtida yo‘naltirish uchun masʼul hisoblanadi.

Agentlik tomonidan doimiy parvarishga muhtoj bolalarda sog‘liq holatidagi o‘zgarishlarni o‘z vaqtida aniqlash va zarur yordamni ko‘rsatish muhimligi qayd etildi.

Taʼkidlanishicha, “G‘amxo‘rlik” markazlarida parvarish va tibbiy xizmatlar sifatini yana-da oshirish masalasi doimiy nazoratda bo‘ladi.