Jarohat, hujjatsizlik va mablag‘sizlik: Yekaterinburgdagi o‘zbekistonlik vatanga qaytarildi
Vaqtincha yashash joyida yiqilib, og‘ir jarohat olgan o‘zbekistonlik mablag‘i yo‘qligi sabab zarur davolanishni ololmay, mehnat faoliyatini ham davom ettira olmagan.
Rossiyaning Yekaterinburg shahrida og‘ir moddiy va jismoniy ahvolga tushib qolgan O‘zbekiston fuqarosiga vatanga qaytishida yordam ko‘rsatildi. Bu haqda “Dunyo” axborot agentligi xabar berdi.
Maʼlum qilinishicha, Toshkent viloyatida tug‘ilgan A. D. 8-sentabr kuni O‘zbekistonning Yekaterinburg shahridagi Bosh konsulxonasiga murojaat qilgan.
U 2026-yil yanvar oyida Sverdlovsk viloyatiga vaqtincha mehnat faoliyati bilan shug‘ullanish uchun kelgan. Biroq iyul oyida vaqtincha yashash joyida yiqilib, umurtqa pog‘onasidan og‘ir jarohat olgan.
Mablag‘i yetishmagani sababli zarur davolanish kursini ololmagan va mehnat faoliyatini davom ettira olmagan. Bundan tashqari, shaxsini tasdiqlovchi hujjatlari ham foydalanishga yaroqsiz holga kelgan.
Konsullik xodimlari holatni o‘rganib, tegishli idoralar bilan hamkorlikda zarur choralarni ko‘rgan. Fuqaroga O‘zbekistonga qaytish guvohnomasi rasmiylashtirib berilgan.
Shuningdek, belgilangan tartibda Migratsiya agentligi jamg‘armasi mablag‘lari hisobidan “Yekaterinburg–Toshkent” yo‘nalishidagi aviareysga chipta xarid qilingan.
U Bosh konsulxona hamda Migratsiya agentligi xodimlari kuzatuvida O‘zbekistonga eson-omon qaytarilgan.
