“Majlis o‘tkazmadim”: Kattaxonova dam olish kunidagi qabulga izoh berdi
Uning aytishicha, jarayonga hududlardagi xodimlar jalb qilinmagan.
Ijtimoiy tarmoqlarda Bosh vazir o‘rinbosari, Oila va xotin-qizlar qo‘mitasi raisi Dilnoza Kattaxonova yakshanba kuni majlis o‘tkazgani haqida xabarlar tarqaldi. Holat jamoatchilikda turli munosabatlarga sabab bo‘ldi.
Ayrim foydalanuvchilar dam olish kunida davlat idoralari xodimlarini ishga jalb qilishni tanqid qilib, buni “majlisbozlik” deb baholadi.
Kattaxonova esa o‘zining ijtimoiy tarmoqdagi sahifasida tarqalgan xabarlarga izoh berdi.
«Bu masalaga yana bir bor aniqlik kiritib qo‘ymoqchiman. Birinchidan, men majlis o‘tkazmadim. Shaxsiy qabul qilishimni so‘ragan fuqarolarning murojaatlarini Zoom orqali o‘rgandim.
Ikkinchidan, qabul yakshanba kuni emas, hafta boshidagi 5 kunlik dam olish kunlari davomida fuqarolarni uzoq kuttirmaslik maqsadida tashkil etildi. Jarayonga hududlardagi xodimlar jalb qilinmadi.
Uchinchidan, men davlat xizmatchilarining dam olish kunlarini, ayniqsa yakshanbani, o‘z oilasi bag‘rida o‘tkazishi tarafdoriman», — deya yozadi Bosh vazir o‘rinbosari.
