Samarqanddagi portlash: mahalliy aholi norozi
Holat aholi yashash joylariga yaqin tog‘li hududda sodir bo‘lgan.
Ijtimoiy tarmoqlarda Samarqand viloyati Nurobod tumanidagi “Tepaqul” MFY hududida yirik portlash sodir bo‘lgani haqida tarqalgan xabarlar yuzasidan Ekologiya bosh boshqarmasi tomonidan o‘rganish olib borildi.
Maʼlum bo‘lishicha, portlatish ishlari Nurobod tumanida emas, balki Samarqand shahri, Go‘ro‘g‘li ko‘chasi, 12-uy manzilida joylashgan «SAM NURAFSHON GROUP» MCHJ tomonidan aholi yashash joylariga yaqin tog‘li hududda amalga oshirilgan.
Qayd etilishicha, mazkur ishlar mahalliy aholining jiddiy eʼtirozlariga sabab bo‘lgan. Ayni paytda hududda nazorat tadbirlari olib borilib, davlat inspektorlari tomonidan zarur hujjatlar o‘rganilmoqda.
Shuningdek, holatni belgilangan tartibda tekshirish uchun Biznes-ombudsmanning tegishli javob xatiga muvofiq zarur hujjatlar taqdim etilgan.
O‘rganishlar yakunlangach, holatga qonunchilik doirasida huquqiy baho beriladi. Natijalar yuzasidan jamoatchilikka qo‘shimcha maʼlumot taqdim etilishi maʼlum qilindi.
