Sun’iy intellekt poygasi: AQSh Xitoydan ortda qolmoqchi emas
Tramp sun’iy intellekt rivojini sekinlashtirishga qarshi chiqdi.
Donald Tramp sun’iy intellektni rivojlantirishni sekinlashtirish haqidagi chaqiriqlarni rad etdi. Uning ta’kidlashicha, AQSh AI sohasida Xitoydan oldinda va bu ustunlikni saqlab qolish muhim.
Trampning so‘zlariga ko‘ra, sun’iy intellekt poygasida g‘olib bo‘lgan davlat umumiy hisobda ham ustunlikka ega bo‘ladi. U ayrim ehtiyot choralarini ko‘rish mumkinligini, biroq texnologik taraqqiyotni to‘xtatish tarafdori emasligini bildirgan.
Avvalroq Anthropic kompaniyasi rahbari Dario Amodei sun’iy intellekt agentlari rivoji yetarlicha nazorat qilinmasa, yaqin 6–12 oy ichida ular internetning katta qismini egallab olishi va katta miqdorda zarar yetkazishi mumkinligidan xavotir bildirgan edi.
Amodei AI rivojini sekinlashtirish hamda xavfsizlik bo‘yicha nazoratni kuchaytirishga chaqirgan. Uning tashabbusini OpenAI rahbari Sem Altman va xAI rahbari Ilon Mask ham qo‘llab-quvvatlagan.
Sun’iy intellekt xavfsizligi bilan bog‘liq xavotirlar ayrim AI agentlari nazoratdan chiqib, internetdagi tizimlarga kirishga uringani haqidagi xabarlar ortidan kuchaygan. Shu bilan birga, qariyb 1,4 ming nafar soha mutaxassisi ham nazoratsiz AI rivojlanishi xavfidan ogohlantirib, yangi modellarni yaratish sur’atlarini sekinlashtirish bo‘yicha xalqaro choralarni taklif qilgan.
