Transformator yong‘ini: ayrim hududlar vaqtincha elektrsiz qoldi
Yong'inga qisqa tutashuv va transformator moyining sizib chiqishi sabab bo‘lgan.
Toshkent shahri Yunusobod tumanining 11-dahasida transformator punktida yong‘in sodir bo‘ldi. Hodisa oqibatida hududdagi ayrim iste’molchilarning elektr ta’minoti vaqtincha uzilgan.
Ma’lum qilinishicha, 14-sentabr kuni soat 00:30 da Favqulodda vaziyatlar boshqarmasiga transformator yonayotgani haqida xabar kelib tushgan. Qutqaruvchilar voqea joyiga yetib borib, yong‘inni soat 01:09 da to‘liq bartaraf etgan. Hodisa oqibatida jabrlanganlar yo‘q.
Dastlabki ma’lumotlarga ko‘ra, yong‘inga transformatorning birinchi seksiyasida yuzaga kelgan qisqa tutashuv va transformator moyining sizib chiqishi sabab bo‘lgan.
Xavfsizlikni ta’minlash maqsadida hududdagi elektr iste’molchilari vaqtincha tarmoqdan uzilgan. Ayni paytda Yunusobod tuman elektr tarmoqlari korxonasi mutaxassislari tomonidan nosozlik oqibatlarini bartaraf etish va transformator punktini tiklash ishlari olib borilmoqda.
Qayd etilishicha, ishlar yakunlangach, iste’molchilarning elektr ta’minoti bosqichma-bosqich tiklanadi.
