Ustingga qaynoq suv quysam, kuyasanmi? — Jizzaxdagi kelinga zo‘ravonlik holati yuzasidan jinoyat ishi qo‘zg‘atildi

 

Jizzax viloyatida kelin oilaviy zo‘ravonlikka uchragani haqidagi xabarlar yuzasidan jinoyat ishi qo‘zg‘atildi. Bu haqda Jizzax viloyati IIB axborot xizmati ma’lum qildi.

 

Qayd etilishicha, 2026-yil 6-sentabr kuni Sharof Rashidov tumani Qahramon MFYda yashovchi F. M. issiq suv sepilishi oqibatida turli darajadagi kuyish jarohatlari bilan Respublika shoshilinch tibbiy yordam ilmiy markazining Jizzax filialiga yotqizilgan.

 

Tibbiy muassasa ma’lumotnomasiga ko‘ra, ayolning chap qo‘l yelka sohasi, chap oyoq son sohasi, o‘ng oyoq tizza bo‘g‘imi va qorin qovuq sohasida 6–8 foiz miqdorida 2–3A darajali kuyish jarohatlari aniqlangan.

 

Holat yuzasidan tezkor-tergov guruhi tuzilib, voqea joyi ko‘zdan kechirilgan va ashyoviy dalillar protsessual tartibda rasmiylashtirilgan. Shuningdek, jabrlanuvchining tan jarohatlariga huquqiy baho berish uchun sud-tibbiy ekspertizasi tayinlangan.

 

2026-yil 8-sentabr kuni Sharof Rashidov tumani IIB huzuridagi Tergov bo‘limi tomonidan Jinoyat kodeksining 109-moddasi 1-qismi bilan jinoyat ishi qo‘zg‘atilgan.

 

Ijtimoiy tarmoqlarda ayol bir necha oy davomida qaynonasi va qaynopasi tomonidan kaltaklangani, xonaga qamab qo‘yilgani hamda qaynoq suv quyilgani haqida da’volar tarqalgan.

 Shuningdek, uning oziq-ovqat va suvdan mahrum qilingani, tahdid qilingani haqidagi ma’lumotlar ham e’lon qilingan.

 

IIB ma’lumotiga ko‘ra, mazkur xabarlarda keltirilgan holatlar ham tergov doirasida har tomonlama va xolisona o‘rganilmoqda.

 

Tergov yakuniga ko‘ra, holatga qonunchilikda belgilangan tartibda huquqiy baho beriladi.