Buxorodagi neft omborida yong‘in: 3 fuqaro jarohatlandi
Yong'in oqibatida ombordagi bitta yoqilg‘i rezervuari yonib, zararlangan.
Buxoro viloyatining Qorovulbozor tumanidagi neft mahsulotlarini saqlash omborida yong‘in sodir bo‘ldi. Hodisa oqibatida uch nafar fuqaro kuyish jarohatlari bilan shifoxonaga yotqizilgan.
15-sentabr kuni soat 10:30 da “112” tizimi orqali Buxoro viloyati FVBga Qorovulbozor tumani “Cho‘lquvar” MFY hududida joylashgan neft mahsulotlarini saqlash omboridagi rezervuarlardan birida yong‘in chiqqani haqida xabar kelib tushgan.
Xabarga ko‘ra, qutqaruv bo‘linmalari zudlik bilan voqea joyiga yetib borgan. Yong‘in soat 11:18 da to‘liq bartaraf etilgan. Uni o‘chirish ishlariga 14 ta qutqaruv bo‘linmasi jalb qilingan.
Dastlabki ma’lumotlarga ko‘ra, ombordagi bitta yoqilg‘i rezervuari yonib, zararlangan. Yong‘in oqibatida uch nafar fuqaro turli darajadagi kuyish tan jarohatlari bilan Qorako‘l tumani tibbiyot birlashmasiga yotqizilgan.
Hozirda yong‘inning kelib chiqish sababi va yetkazilgan zarar miqdori aniqlanmoqda.
Voqea joyida viloyat FVB, IIB, SSB rahbariyati hamda tegishli xizmatlar xodimlari ish olib bormoqda.
