Dam olish kunlari majburiy ish: bo‘lim boshlig‘i xodimlarni majburan ishga jalb qildi
Holat yuzasidan mansabdorga nisbatan maʼmuriy bayonnoma rasmiylashtirilib, jarima solingan.
Sirdaryoda xodimlarni dam olish kunlari ishga jalb qilgan bo‘lim boshlig‘i jarimaga tortildi. Holat Ombudsman va Davlat mehnat inspeksiyasi tomonidan o‘rganilgan.
Ombudsmanga “Sirdaryo suv taʼminoti” AJning Xovos tumani bo‘limi xodimlari dam olish va bayram kunlari majburan ishga jalb qilinayotgani haqida murojaat kelib tushgan.
Murojaat Ombudsmanning Sirdaryo viloyatidagi mintaqaviy vakili hamda viloyat Davlat mehnat inspeksiyasi tomonidan o‘rganilgan. Tekshiruv davomida xodimlarning tushuntirish xatlari, Telegram tarmog‘idagi videolar va ularni ishga chiqishga chaqirish bilan bog‘liq audioyozuvlar tahlil qilingan.
O‘rganish natijasida xodimlarning dam olish kunlari ishga jalb qilingani o‘z tasdig‘ini topgan.
Shundan so‘ng bo‘lim boshlig‘i A. P. ga nisbatan Maʼmuriy javobgarlik to‘g‘risidagi kodeksning 51-moddasi 1-qismi asosida maʼmuriy bayonnoma rasmiylashtirilgan.
Masʼulga 41 mln 200 ming so‘m miqdorida jarima qo‘llangan.
