Darsdagi tortishuv: o‘quvchi qizni sinfdoshining onasi kaltakladi
Dars vaqtida ikki qiz o‘rtasida tortishuv yuzaga kelgan. Mojaro ortidan birining onasi ikkinchi qizni darsdan chaqirtirib, uning bo‘ynini tirnagani va jismoniy kuch ishlatgan.
Ijtimoiy tarmoqlarda Sirdaryo viloyatidagi maktablardan birida o‘quvchining kaltaklangani haqida tarqalgan xabar yuzasidan holat Bolalar ombudsmani nazoratida o‘rganilmoqda.
Aniqlanishicha, 7-sentabr kuni viloyatdagi umumiy o‘rta ta’lim maktabida tahsil olayotgan, 2013-yilda tug‘ilgan A.Z. va Z.A. ismli ikki nafar qiz dars vaqtida o‘zaro tortishib, ular o‘rtasida nizo kelib chiqqan.
Keyingi kuni A.Z.ning onasi S.Sh. maktab ma’muriyatiga murojaat qilmasdan, belgilangan tartibga zid ravishda o‘quv mashg‘uloti davomida voyaga yetmagan Z.A.ni darsdan chaqirtirgan.
Shundan so‘ng ular o‘rtasidagi suhbat keskinlashgani va ayol voyaga yetmagan qizga jismoniy kuch ishlatib, uning bo‘ynini tirnagani aniqlangan.
Mazkur holat yuzasidan Sirdaryo viloyati Boyovut tumani IIB tomonidan tergovga qadar tekshiruv olib borilmoqda.
Ayni paytda voyaga yetmagan qizning sog‘lig‘iga yetkazilgan zarar darajasini aniqlash maqsadida sud-tibbiy ekspertizasi tayinlangan.
Bolalar ombudsmani bolaning huquq va qonuniy manfaatlarini ta’minlash masalasini nazoratga olgan. Tekshiruv natijalariga ko‘ra holatga tegishli huquqiy baho beriladi.
Qo‘shimcha ma’lumotlar ma’lum bo‘lishi bilan taqdim etilishi bildirildi.
