Harbiy xizmat oldidan tibbiy tekshiruv: narkotik iste’moli maxsus test orqali aniqlanadi
Ijobiy natija qayd etilgan yoki namuna topshirishdan bosh tortganlar harbiy-tibbiy ko‘rikka qo‘yilmaydi.
Muddatli harbiy xizmatga chaqirilayotgan hamda kontrakt bo‘yicha harbiy xizmatga qabul qilinayotgan fuqarolarni narkotik vositalari bo‘yicha tibbiy tekshiruvdan o‘tkazish tartibi belgilandi.
Adliya vazirligi tomonidan mazkur tartibni nazarda tutuvchi idoraviy hujjat davlat ro‘yxatidan o‘tkazildi.
Unga ko‘ra, tibbiy tekshiruv narkotik vositalarini iste’mol qilish holatlarini barvaqt aniqlash maqsadida Respublika sud-tibbiy ekspertiza ilmiy-amaliy markazi va uning hududiy filiallarida o‘tkaziladi.
Muddatli harbiy xizmatga chaqirilayotgan fuqarolar hududiy harbiy-tibbiy komissiyaga yuborilishidan oldin, kontrakt bo‘yicha harbiy xizmatga qabul qilinayotganlar esa harbiy-tibbiy muassasada tibbiy ko‘rikdan o‘tishidan avval tekshiruvdan o‘tkaziladi.
Tekshiruv ikki bosqichda amalga oshiriladi. Dastlab peshob namunasi ekspress-test yordamida tekshiriladi. Natija ijobiy bo‘lgan taqdirda peshob va/yoki qon namunalarida mass-spektrometrik identifikatsiya tekshiruvi o‘tkaziladi.
Tekshiruv natijasi ijobiy chiqqan yoki zarur biologik namunalarni topshirishdan bosh tortgan fuqarolar harbiy-tibbiy ko‘rikdan o‘tkazilmaydi.
Shuningdek, tekshiruv jarayonida olingan shaxsga oid ma’lumotlar, biologik namunalar va natijalarning maxfiyligi ta’minlanadi.
