Xorazmda 15 yoshli yigit “Jiguli”da YPX xodimlari bilan “quvlashmachoq o‘ynadi”
YPX xodimlarining to‘xtash ishoralariga bo‘ysunmasdan harakatini davom ettirgan haydovchi to‘xtatilib, uning otasiga ma’muriy bayonnoma rasmiylashtirildi.
Xorazmda 15 yoshli o‘quvchi “Jiguli”ni katta tezlikda boshqarib, YPX xodimlarining to‘xtash ishorasiga bo‘ysunmadi. Holat Urganch shahridagi mahalla ichki yo‘llaridan birida qayd etilgan.
Xorazm viloyati Yo‘l harakati xavfsizligi boshqarmasining navbatchilik qismiga mahalla ichki yo‘llarida VAZ-2107 rusumli avtomobil katta tezlikda va shovqin-suron bilan harakatlanayotgani haqida xabar kelib tushgan.
Xabar asosida voqea joyiga yetib borgan YPX xodimlari avtomobilni to‘xtatishga bir necha bor qonuniy ishora bergan. Biroq haydovchi talabga bo‘ysunmay, harakatini davom ettirgan.
O‘tkazilgan tezkor tadbirlar natijasida avtomobil to‘xtatilgan. Tekshiruv davomida uning haydovchisi 2011-yilda tug‘ilgan, 15 yoshli, Urganch tumanidagi 2-son umumiy o‘rta ta’lim maktabining 9-sinf o‘quvchisi ekani aniqlangan.
Voyaga yetmagan farzandiga avtomobil boshqarishga yo‘l qo‘ygan otasiga nisbatan Ma’muriy javobgarlik to‘g‘risidagi kodeksning 135-moddasi 2-qismi asosida ma’muriy bayonnoma rasmiylashtirilgan.
VAZ-2107 rusumli avtomobil vaqtincha saqlash uchun jarima maydoniga joylashtirilgan.
