“Amir Temur xiyoboni” metro bekatidagi noxush hidga nima sabab bo‘ldi? Metropoliten izoh berdi
“Toshkent metropoliteni” shahar hokimligi va oqova suv tarmoqlari boshqarmasiga murojaat qildi.
Ijtimoiy tarmoqlarda “Amir Temur xiyoboni” metro bekati hududidan noxush hid kelayotgani haqida xabarlar tarqaldi.
Mazkur holat yuzasidan “Toshkent metropoliteni” AJ izoh berdi.
Aniqlanishicha, noxush hidga Mustaqillik shoh ko‘chasida joylashgan shahar oqova suv tarmog‘idagi nosozlik sabab bo‘lgan.
Xususan, oqova suv tarmog‘idagi nosozlik oqibatida sizib chiqqan suv metro tunnelining beton konstruksiyasi orqali uning ichki qismiga kirgan. Natijada bekat hududida noxush hid yuzaga kelgan.
Mazkur holat bo‘yicha “Toshkent metropoliteni” AJ Toshkent shahar hokimligi hamda shahar oqova suv tarmoqlari boshqarmasiga rasmiy murojaat yo‘llagan.
Murojaatda aniqlangan nosozlikni zudlik bilan bartaraf etish va tegishli choralarni ko‘rish so‘ralgan.
Shuningdek, yo‘lovchilar uchun qulay va xavfsiz sharoitlarni taʼminlash maqsadida holat “Toshkent metropoliteni” AJ tomonidan nazoratga olingan.
