Buxorodagi reydda 211 ta jarimasi bor mashina topildi
Haydovchining 137 mln so‘mlik maʼmuriy jarimasi bo‘lgan.
Majburiy ijro byurosi Buxoro viloyati boshqarmasi qidiruv shoʻbasi hamda viloyat IIB YHXB xodimlari bilan hamkorlikda maxsus reyd tadbirlari o‘tkazilmoqda.
Tadbirlar davomida 2,6 mlrd so‘mlik 114 ta ijro hujjatlari bo‘yicha qarzdorlar nomidagi 98 ta avtotransport vositalari jarima maydonchalariga joylashtirilib, 70 ta 741 mln so‘mlik ijro hujjatlar ijrosi amalda taʼminlandi.
Maʼmuriy jarimalarni undirish to‘g‘risidagi ijro hujjatlar tahlil qilinib, mahalla kesimida manzilli ishlar olib borilmoqda.
Misol uchun, Romitan tumanida yashovchi fuqaro o‘ziga tegishli “TRACKER 2” avtotransport vositasini yo‘l harakati qoidalariga rioya qilinmasdan boshqarishi oqibatida 211 ta 137 mln so‘mlik maʼmuriy jarima qo‘llanilgan.
Qidiruv tadbirlari davomida qidiruvdagi avtomashina topilib, vaqtincha saqlash uchun jarima maydonchasiga joylashtirilgan. Hozirda, qarzdorlarga tegishli bo‘lgan qidiruvdagi avtotransport vositalarini aniqlash borasidagi reyd tadbirlari davom etmoqda.
