Eron urushi AQShga qimmatga tushmoqda: xarajatlar 38 mlrd dollarga yetdi
Urush davom etsa, oyiga yana 3 mlrd dollargacha mablag‘ sarflanishi mumkin.
AQShning Eronga qarshi harbiy operatsiyalari 1-avgustgacha mamlakatga 38 mlrd dollarga tushgan. Urush davom etadigan bo‘lsa, xarajatlar oyiga yana 2–3 mlrd dollarga oshishi mumkin. Bu haqda Reuters AQSh Kongressining Byudjet idorasi (CBO) hisobotiga tayanib xabar berdi.
CBO hisob-kitoblariga ko‘ra, xarajatlarning asosiy qismi o‘q-dorilar va havo mudofaasi tizimlari uchun tutuvchi raketalarni xarid qilish hamda ishlab chiqarishga to‘g‘ri kelgan. AQSh o‘q-dorilar zaxirasini to‘liq tiklash uchun besh yilgacha vaqt talab qilinishi mumkin.
Hisobotda, shuningdek, harbiy operatsiyalar AQSh iqtisodiyotiga ta’sir ko‘rsatishi qayd etilgan. CBO prognoziga ko‘ra, urush 2027-yilning dastlabki uch oyida inflyatsiyani 0,5 foiz punktga oshirishi mumkin.
CBO ma’lumotlariga ko‘ra, hisob-kitoblar AQSh Mudofaa vazirligining hamkorligisiz tayyorlangan. Reuters xabarida Pentagon CBO auditorlari bilan hisobotni tayyorlash jarayonida hamkorlik qilmagani qayd etilgan.
Shu bilan birga, CBO hisob-kitoblari 1-avgustgacha bo‘lgan xarajatlarni qamrab oladi. Urush davom etishi bilan umumiy xarajatlar yanada oshishi kutilmoqda.
