Hujjatsizlik va moliyaviy qiyinchilik: Novosibirskda 6 nafar o‘zbekistonlikka ko‘mak berildi
O‘zbekiston Bosh konsulxonasi va Migratsiya agentligi vakillari Novosibirskdagi korxonalarda ishlayotgan vatandoshlar bilan uchrashdi.
O‘zbekiston Bosh konsulxonasi va Migratsiya agentligining Novosibirskdagi vakolatxonasi viloyatdagi korxonalarda mehnat qilayotgan vatandoshlar bilan sayyor uchrashuvlar o‘tkazdi. Bu haqda “Dunyo” AA xabar berdi.
Diplomatlar “Sibpekar”, «Xiloks tovar bazasi» hamda “SIBELEKTROTERM” korxonalarida ishlayotgan o‘zbekistonliklar bilan uchrashdi.
Muloqotlar davomida vatandoshlarga konsullik-huquqiy masalalar bo‘yicha maslahatlar berilib, diplomatik vakolatxonalarning manzillari va yordam ko‘rsatish uchun mo‘ljallangan koll-markazlar haqida maʼlumotlar taqdim etildi.
Shuningdek, ish haqini o‘z vaqtida to‘lash masalasiga alohida eʼtibor qaratildi. To‘lovlar asossiz kechiktirilgan taqdirda, masalani tezkor hal qilish uchun Migratsiya agentligining Novosibirskdagi vakolatxonasiga murojaat qilish tavsiya etildi
Uchrashuvlar davomida og‘ir moliyaviy ahvolga tushib qolgan va vatanga qaytishga muhtoj bo‘lgan 6 nafar O‘zbekiston fuqarosiga, jumladan, voyaga yetmagan bolalarga yordam ko‘rsatildi. Ularning zarur hujjatlari rasmiylashtirilib, O‘zbekistonga qaytishi uchun aviachiptalar taqdim etildi.
