Namanganda kredit qarzi sabab BYD xatlandi
Ayni paytda qarzdorlikni qoplash maqsadida belgilangan tartibda ijro harakatlari davom ettirilmoqda.
Majburiy ijro byurosi Namangan viloyati boshqarmasi tomonidan sud va boshqa vakolatli organlar hujjatlarining ijrosini taʼminlash, fuqarolar va tashkilotlarning qonuniy manfaatlarini himoya qilish borasida belgilangan tartibda ijro harakatlari amalga oshirilmoqda.
Xususan, Byuroning Namangan viloyati boshqarmasi ish yurituvida bo‘lgan ijro hujjatiga asosan, qarzdor J.A.dan undiruvchi — AT “Aloqabank” foydasiga 325 mln 610 ming so‘m miqdoridagi kredit qarzdorligini undirish belgilangan.
Mazkur ijro hujjati bo‘yicha qarzdorga ijro hujjati talablarini ixtiyoriy ravishda bajarish zarurligi tushuntirilib, qarzdorlikni undirish yuzasidan qonunchilikda belgilangan.
Biroq, ixtiyoriy muddatda qarzdorlik qoplanganmaganligi sababli ijro harakatlariga kirishildi. Tadbir davomida qarzdorning kredit majburiyatlari bo‘yicha bankka garov sifatida qo‘yilgan qiymati 409 mln 700 ming so‘mga baholangan BYD rusumli avtotransport vositasi aniqlandi va belgilangan tartibda xatlandi.
Ayni vaqtda ijro hujjati talablarining amalda taʼminlanishi, undiruvchi AT “Aloqabank”ning qonuniy talablari bajarilishi hamda qarzdorlikni qoplash maqsadida belgilangan tartibda ijro harakatlari davom ettirilmoqda.
