“Sababini tushuntirmadi, hujjat ko‘rsatmadi”: Sirdaryodagi IIB xodimlari jazolandi
Fuqaroni o‘z uyidan sababsiz olib ketishga uringan IIBning ayrim xodimlariga nisbatan xizmat tekshiruvi tayinlandi.
Oliy Majlisning Inson huquqlari bo‘yicha vakiliga (Ombudsman) Sirdaryo viloyatidan fuqaro D. A. murojaat qilib, ichki ishlar organlari xodimlarining xatti-harakatlaridan noroziligini bildirgan. Bu haqda Ombudsman matbuot xizmati xabar berdi.
Murojaatda qayd etilishicha, Xovos tumanidagi xonadonlardan biriga profilaktika inspektori boshchiligida ichki ishlar organlari xodimlari kelib, murojaatchining turmush o‘rtog‘ini olib ketishga uringan. Fuqaroning bildirishicha, xodimlar bu harakat sababini tushuntirmagan va tegishli hujjatlarni ko‘rsatmagan.
Murojaat Ombudsman nazoratiga olingan. Holat Ombudsmanning Sirdaryo viloyatidagi mintaqaviy vakili tomonidan o‘rganilib, IIB xodimlarining harakatlariga huquqiy baho berish uchun Sirdaryo viloyati Ichki ishlar boshqarmasiga nazorat xati yuborilgan.
Shundan so‘ng Xovos tumani IIBning ayrim xodimlariga nisbatan xizmat tekshiruvi tayinlangan.
Tekshiruv yakuniga ko‘ra, xizmat faoliyatida aniqlangan kamchiliklar sabab 4 nafar xodimga “hayfsan” va “tanbeh” intizomiy jazo choralari qo‘llanilgan.
Shuningdek, yana bir xodimning xatti-harakatlariga yakuniy baho berish masalasi Intizomiy kengashga havola etilgan.
