Toshkentda er-xotin o‘rtasidagi mulkiy nizo MIBda hal bo‘ldi
Ijro davomida erkakdan uning turmush o‘rtog‘iga to‘lanadigan 74 mln undirib, ish tamomlangan.
Oilaviy hayot davomida orttirilgan mol-mulkni taqsimlash masalasi baʼzan er-xotin o‘rtasida nizoga sabab bo‘lishi mumkin. Bunday holatda sud qarorining ijrosini taʼminlash ham muhim ahamiyat kasb etadi.
Byuroning Olmazor tuman bo‘limi ish yurituviga fuqarolik ishlari bo‘yicha Shayxontohur tumanlararo sudining 2026 yil 9 fevraldagi qarori asosida qarzdor T.A.dan undiruvchi T.F. foydasiga nikoh davrida orttirilgan “BMW-520” rusumli avtomashinaning 1/2 qismi qiymati — 74 million 700 ming so‘m undirish haqidagi ijro hujjati 2026 yil 3 aprel kuni kelib tushgan.
Shu kuni ijro ishi yuritish qo‘zg‘atilib, sud hujjatida belgilangan talablarni taʼminlash maqsadida qarzdorning avtotransportiga nisbatan taqiq o‘rnatildi hamda avtomashina qidiruvga berildi.
Ijro harakatlari davomida qarzdor T.A. avtomashinadan ayrilib qolmaslik maqsadida sud qarorida belgilangan 74 million 700 ming so‘m mablag‘ni to‘liq to‘ladi.
Ushbu mablag‘ undiruvchi T.F.ning shaxsiy plastik hisob raqamiga o‘tkazib berildi.
Shu tariqa, sud qarorida belgilangan majburiyat amalda taʼminlanib, undiruvchining qonuniy manfaati tiklandi. Ijro hujjati talablari to‘liq bajarilganligi sababli ish yurituvi “Sud hujjatlari va boshqa organlar hujjatlarini ijro etish to‘g‘risida”gi Qonunning 41-moddasiga asosan amalda tamomlandi.
