Tungi “operatsiya” omadsiz tugadi: Sirdaryoda 17 yoshli yigit ushlandi
Bolta bilan bankomatni buzishga uringan o‘smir tashvish signali tufayli qo‘lga tushdi.
Sirdaryo viloyati Guliston tumanida tungi vaqtda bankomatni buzib, undagi pullarni o‘g‘irlashga uringan o‘smir Qo‘riqlash xizmati xodimlari tomonidan qo‘lga olindi. Bu haqda Sirdaryo viloyati Ichki ishlar boshqarmasi xabar berdi.
Voqea 12-sentyabr kuni soat 03:16 larda Guliston tumanidagi «Oltin vodiy» MFY, Komiliy ko‘chasida sodir bo‘lgan.
Mazkur hududdagi «Inkassatsiya xizmati» MCHJga qarashli bankomatdan Sirdaryo viloyati IIB huzuridagi Qo‘riqlash xizmati monitoring markaziga tashvish signali kelib tushgan.
Voqea joyiga yetib borgan xodimlar bankomat oldida yuzini yashirgan, qo‘lida bolta va boshqa ashyolar bilan uning tashqi qismini buzishga urinayotgan shaxsni aniqlagan.
Qo‘riqlash xizmati xodimlarini ko‘rgan gumonlanuvchi voqea joyidan qochishga uringan. Biroq tezkor guruh xodimlari tomonidan u qo‘lga olingan.
Surishtiruv davomida qo‘lga olingan shaxs Guliston tumanida yashovchi, 2008-yilda tug‘ilgan D. S. ekani aniqlangan. U belgilangan tartibda tuman Ichki ishlar bo‘limiga olib borilgan.
Hozirda mazkur holat yuzasidan tergov-surishtiruv ishlari olib borilmoqda.
